Türkiyə qırıcı təyyarələrinin Bakı üzərində göstərəcəyi aviaşou Tehranda siyasi vəlvələ yaradıb. "Türk Ulduzları"nın bu aksiyasının gerçək mesajını yaxşı dərk edən İran ona sərt e`tiraz bildirməkdə ləngimədi. Bazar günü İran Məclisinin sessiyasında çıxış edən xarici işlər naziri Kamal Xərrazi Türkiyənin Bakıya yüksək pilotaj eskadrilyası göndərməsini "təxribat" adlandırıb. İran nazirinin iddiasına görə, Ankaranın bu addımı Xəzərdə cərəyan edən hadisələrə müdaxilə olmaqla yanaşı, vəziyyəti gərginləşdirə bilər. İran naziri Xəzər hövzəsinə kənar qüvvələrin müdaxiləsinə qarşı çıxıb.