Avqustun 18-də keçirilən üç maçtla Azərbaycanın futbol üzrə növbəti - XI çempionatı start götürdü. Həmin gün keçirilən oyunlar içərisində daha çox maraq doğuranı ölkəmizi UEFA kuboku yarışlarında təmsil edəcək "Neftçi" və "Şəfa" komandalarının iştirakı ilə keçirilən görüşlər idi.

İsmət Qayıbov adına stadionda birinciliyin debütantı - "Ümid"i qəbul edən Kazbek Tuayevin komandası 4:0 hesabı ilə qalib gəldi. Bu qələbənin UEFA Kuboku uğrunda avqustun 23-də Sloveniyanın "Hit Qoritsa" klubu ilə oyuna çıxacaq "Neftçi" üçün əhəmiyyəti böyükdür. Bu görüşdə hesabı açan və XI milli çempionatın ilk qolunu vuran Qurban Qurbanov daha iki qolun müəllifi oldu. UEFA Kuboku yarışlarında ölkəmizin ikinci təmsilçisi - "Şəfa"da ilk turda qələbəni bayram edib. UEFA yarışları çərçivəsində bütün yayı məşq etmiş Əsgər Abdullayevin komandası "Kəpəz"i 3:1 hesabı ilə məğlub edib. Hazırlığının bir hissəsini İranda keçirməklə mövsümə yaxşı hazırlaşmış "Xəzər Universiteti" isə sonuncu mövsümdən sonra məşqçisini və bir sıra aparıcı oyunçularını itirmiş "Turan"a 3:2 hesabilə qalib gəlib. Çempionatın ilk turunun ən böyük nəticəsi isə Şəmkirdə qeyd alınıb. Avqustun 19-da çempion öz meydanında OMİK-i 6:0 hesabı ilə darmadağın edib. Bu görüşdə Mahmud Qurbanov, Vidadi Rzayev və klubun yeni futbolçusu Alay Bəhramov hərəyə iki top vurublar. Görünür, baş məşqçi Ağasəlim Mircavadovun komandadan getməsinə baxmayaraq, "Şəmkir" özünəməxsus oyun üslubunu və gücünü qoruyub saxlaya bilib. Çempionata yeni adla çıxan "Qarabağ/Azərsun" Sumqayıtda "Dinamo/Bakılını 1:0 hesabı ilə məğlub edib. "Viləş" Qusarda yerli "Şahdağ"la oyuna getmədiyinə görə, ona texniki məğlubiyyət veriləcək. Gəray Gərayevin matça getməməsini klubun sponsorla problemləri ilə izah edirlər. Beləliklə, ilk tura böyük hesablı qələbə ilə başlayan "Şəmkir" və "Neftçi" çempionluğa ən real şanslı komanda tə’siri bağışladılar.

Xəbər verdiyimiz kimi, Azərbaycanın qadınlardan ibarət voleybol komandası Hollandiyanın Hertogenboş şəhərində 14-cü dünya çempionatının seçmə yarışlarında iştirak ediblər. Baş məşqçi Faiq Qarayevin yetirmələri bu mərhələdə uğurla yarışaraq, gələn il Almaniyada keçiriləcək dünya çempionatının final mərhələsində iştirak etmək hüququ qazanıblar.
Xatırladaq ki, turnirdə Azərbaycan voleybolçuları ilə yanaşı Hollandiya, Türkiyə və Fransa komandaları da mübarizə aparırdılar. Voleybolçularımız birinci görüşü yerli komandaya qarşı keçiriblər. Almaniyalı və finlandiyalı hakimlər tərəfindən çox böyük haqsızlıqla qarşılaşan voleybolçu qızlarımız 2:3 hesabı ilə məğlub olublar. Görüşdən dərhal sonra komandamızın rəhbərliyi ədalətsizliklərlə bağlı e’tiraz yazıb. Ancaq bu məğlubiyyətdən sonra ruhdan düşməyən qızlarımız əvvəlcə Türkiyə komandasını 3:1 və Fransa voleybolçularını 3:0 hesabı ilə məğlub edərək, dünya çempionatının finalına vəsiqə qazanıblar.