#121(345)

Türkiyənin Hərbi Dəniz Qüvvələri Amerikanın terror əməliyyatı ilə əlaqədar ölkənin strateji əhəmiyyətli dəniz kommunikasiyalarında görünməmiş təhlükəsizlik tədbirlərinə əl atıb. Qara və Aralıq dənizlərini birləşdirən Bosfor və Dardanell boğazlarında Avropa ilə Asiya arasında hərəkət edən səyahət qayıqlarına, habelə balıqçı gəmilərinə nəzarət gücləndirilib. Dəniz polisi hesab edir ki, həmin qayıqlar terrorçuların çirkin niyyətlərinin həyata keçirilməsi üçün istifadə oluna bilər.

Özbəkistan Prokurorluğu məhkəməyə müraciət edərək ölkənin 9 vətəndaşının "Hizb-üt-Təhrir" partiyasına mənsub olduğu üçün onların 16 il azadlıqdan məhrum edilməsini tələb edib. Qeyd edək ki, bu, "Hizb-üt-Təhrir" tərəfdarları üzərində qurulan ilk məhkəmə prosesi deyil. Prokuror şənbə günü keçirilən prosesdə yekun ittihamnaməsini oxuyarkən qeyd edib ki, dünyanın əksər ölkələrində fəaliyyəti yasaq edilən partiyanın üzvləri Üsəma ben Ladenin "Əl-Qayda" təşkilatı ilə əməkdaşlıq edir. Yeri gəlmişkən, analoji proses partiyanın Qırğızıstandakı üzvləri üzərində də keçirilib.

Qətərin "Əl-Cəzirə" telekanalı məlumat verib ki, Əfqanıstanda üçü ABŞ hərbçisi olmaqla 5 nəfərlik xüsusi təyinatlı qrup yaxalanıb. Bu haqda məlumatlar digər ərəb qəzetlərində də dərc olunub. Pentaqon sözçüsü Brayan Keybell ABŞ hərbçilərinin yaxalanması barədə ərəb KİV-ində dərc edilən materialların həqiqətə uyğun olmadığını bildirib. Öz növbəsində Taliban hökuməti də ABŞ xüsusi təyinatlılarının tutulması haqda xəbərləri təkzib edib. Hökumət nümayəndəsi Molla Abdulla Axund deyib ki, hazırda Əfqanıstan ərazisinin taliblərin nəzarəti altında olan hissələrində ABŞ komandoları yoxdur. Bu arada Üsəma ben Ladenin başçılıq etdiyi "Əl-Qayda" təşkilatı ABŞ xüsusi təyinatlılarının Əfqanıstanda tutulması faktını yenidən təsdiqləyib. "Əl-Qayda" tutulanların fotoşəklini göstərəcəyinə söz verib.

Səudiyyə Ərəbistanı ABŞ Hərbi Hava Qüvvələrinə bu ölkə ərazilərində yerləşən bazalardan istifadə etmək icazəsi vermədiyini bildirib. Hökumət rəsmən bəyan edib ki, Əl-Xərc yaxınlığındakı "Prince Sultan" bazası Əfqanıstanı bombalayacaq təyyarələrin uçuşuna bağlıdır.

Antitaliban koalisiyasının nümayəndələrindən ibarət bir heyət Əfqanıstanın keçmiş şahı Zakir şahla görüşmək üçün İtaliya paytaxtına gəlib. Əsas məqsəd monarxın başçılıq edəcəyi Ali Şuranın və Ali Hərbi Şuranın yaradılmasıdır.

Səhra komandiri general Əbdürrəşid Dustum Rusiya və Orta Asiya dövlətlərini Şimal Alyansına yardımı tezləşdirməyə çağırıb. Dustum Rusiya prezidentinin Əfqanıstana yardım etmək niyyətini alqışladığını bildirərək deyib: "Mən Rusiya prezidentini yaxşı tanıyıram, o mənim dostumdur". Dustum Tahir Yoldaşov və Cümə Xociyevin (Nəmənqani) Taliban düşərgəsində döyüşdüyünü, onların dəstəsində özbək, tacik, uyğur və qazaxların olduğunu deyib.

Belfast yaxınlığındakı Lurqan yaşayış məntəqəsində katolik "Sundy wolrd" nəşrinin jurnalisti Martin O’Haqan öldürülüb. Yerli polisin açıqlamalarına görə, jurnalist həyat yoldaşı ilə küçədə gedərkən, onlara bir avtomobil yaxınlaşıb. Maşının kabinəsindən açılan atəş nəticəsində O’Haqan ölümcül yaralanıb. Jurnalistin qətli haqda ilk fərziyyələrə görə, onu hərbiləşdirilmiş protestantlar arasındakı bədxahları öldürüb.

ABŞ Pakistana iqtisadi yardım kimi 50 milyon dollarlıq vəsait ayırıb. Ağ Evin rəsmi nümayəndəsi Şon Makkormik deyib ki, bu vəsait 1961-ci ildə qəbul edilmiş xarici dövlətlərə yardım haqqında qanun əsasında ayrılıb və onun məqsədi Pakistan dövlətinin büdcə təminatını gücləndirməkdir. Prezident Corc Buş dövlət katibi Kolin Pauellə göndərdiyi məktubunda yazıb ki, bu addım "ABŞ-ın təhlükəsizliyi üçün vacibdir". Bu arada "News" qəzeti Pakistana 75 milyon dollar həcmində hərbi yardım veriləcəyi haqda məlumatlar yayıb. Qəzetin yazmasına görə, ABŞ tərəfi Pakistana 2500 kilometrlik əfqan sərhədinə nəzarəti həyata keçirmək üçün hərbi vertolyotlar verəcək. Xatırladaq ki, Pakistan 1998-ci ildə nüvə sınaqları keçirdiyinə görə, ABŞ bu ölkəyə silah və hərbi sursat verilməsinə veto qoymuşdu.

Oktyabrın 4-də Azərbaycanın gömrük orqanlarının işini modernləşdirmək və fəaliyyətinin səmərəliliyini artırmaq məqsədilə tender keçiriləcək. Qeyd edək ki, hökumətin hazırladığı "Yoxsulluğun ixtisarı və iqtisadi artımın təmin edilməsi" proqramını maliyyələşdirmək üçün Beynəlxalq Valyuta Fondunun irəli sürdüyü şərtlərdən biri gömrük orqanlarında şəffaflığın təmin edilməsi üçün tədbirlər həyata keçirməkdir. Beynəlxalq Valyuta Fondu 100 milyon dollar krediti həmin şərtlərin yerinə yetirilməsi müqabilində verəcək. Gömrük orqanlarına aid tədbirlər planına əsasən, tender qalibi olan auditor şirkəti Azərbaycanın gömrük sistemini öyrənəndən sonra təkmilləşdirmə işinin aparılması üçün tövsiyələr verəcək. Tender iştirakçıları "Artur Andersen", "Kroun Eycensi", "Veqa" və "Prije Watersouse Soopers" şirkətləri olacaq. Dövlət Gömrük Komitəsi sədrinin müavini Səlim Müslümovun sözlərinə əsasən, tender qalibinin tövsiyələri də nəzərə alınmaqla Azərbaycanda, bütün Qafqaz bölgəsi üçün nümunəvi gömrük xidməti modeli bərqərar olacaq. Çünki maddi-texniki təhcizat baxımından Azərbaycanın gömrük xidməti region ölkələrindən xeyli irəlidədir.

Baş nazirin müavini Abid Şərifovun verdiyi məlumata görə, nəqliyyat və fövqəladə hallar nazirliklərinin struktur layihələri hazırdır, bunlar müvafiq idarələrlə razılaşdırılıb və baxılmaq üçün Prezident Aparatına təqdim edilib. Digər məsələyə toxunan nazir müavini deyib ki, rəsmi Bakı, Türkiyə ilə iqtisadi sahədə yaranmış bəzi problemləri də artıq həll edib. A.Şərifov bildirib ki, Türkiyənin qaldırdığı 25 məsələnin təxminən yarısı həll edilib. Lakin bir çox problemlərin həlli hələlik açıq qalıb. Onun sözlərindən məlum olur ki, Azərbaycan borcların müddətinin uzadılması üçün danışıqlar aparır. Rəsmi Bakı borcların qaytarılması müddətinin 3 il artırılmasını istəyir. Xatırladaq ki, bu məsələlər müxtəlif vaxtlarda bir neçə dəfə, o cümlədən Türkiyənin dövlət naziri Abdulxaliq Çayın Bakıya səfəri zamanı qaldırılmışdı. Azərbaycan uzunmüddətli fasilədən sonra məsələ ilə bağlı təkliflərini hazırlayıb. Rəsmi Ankaranı narazı salan məsələlərdən biri də İrandan fərqli olaraq, Türkiyədən gələn yük avtomobillərindən yüksək məbləğdə rüsum tutulmasıdır. Abid Şərifovun sözlərinə görə, Azərbaycan eyni rüsumları İrandan gələn yük maşınlarına da tətbiq edəcək. Yəni heç bir güzəştdən söhbət belə gedə bilməz. Çünki indiyədək İran Azərbaycandan bu ölkəyə keçən yük avtomobillərindən lazımi məbləğdə rüsum alıb. Baş nazirin müavini bildirib ki, artıq İrana bununla bağlı təklif göndərilib.

Redaksiyamıza daxil olan məlumata görə, Müdafiə Nazirliyinin Bayılda yerləşən hərbi qospitalının rəis müavini Həsən Mikayıl oğlu Əliyev cinayət məsuliyyətinə cəlb edilib. Onun barəsində Respublika Hərbi Prokurorluğunda cinayət işi qaldırılıb. Məlumatı dəqiqləşdirmək məqsədilə Müdafiə Nazirliyinin mətbuat xidmətinin rəhbəri Ramiz Məlikovla əlaqə saxladıq. O, məlumatı təsdiqləyərək, H.Əliyevin istintaqa cəlb edilməsinin düzgün olduğunu bəyanladı. R.Məlikov bildirdi ki, istintaq yekunlaşdıqdan sonra hər şey məlum olacaq. Mötəbər mənbələrdən aldığımız məlumata görə, H.Əliyev kimlərəsə tez-tez hədə-qorxu gəldiyi üçün həbs edilib.

Polşanın Poznan şəhərində "Avropa rusistikası və müasirlik" mövzusunda IV beynəlxalq elmi konfrans keçirilib. Konfransda dünyanın 18 ölkəsindən alim və mütəxəssislər iştirak edib, 150-dən artıq məruzə dinlənilib. Azərbaycanı konfransda BDU-nun XX əsr rus ədəbiyyatı və ədəbiyyat nəzəriyyəsi kafedrasının müdiri professor Seyfulla Əsədullayev təmsil edib. Alim "Müasir ədəbiyyatşünaslığın metodoloji problemləri" mövzusunda məruzə söyləyib. Konfransı Adam Miskeviç adına universitetin nəzdindəki Rus Filologiyası İnstitutu təşkil edib.

Bəlkə də yazılarımı izləyən kimsə, məni mühafizəkarlıqda, köhnəlikdə günahlandırar. Amma gündəlik həyatda elə eybəcərliklərlə rastlaşıram ki, haray salmaq, həyəcan təbili çalmaq istəyirəm.
Hər metro stansiyasının giriş və çıxışında, iri avtobus dayanacaqlarında audiokasetlərin, maqnit lentlərinin şıdırğı satışı təşkil olunub. Burada yerləşdirilmiş nəhəng reproduktorlardan bütün müğənnilərimizin səsini eşitmək olur. Olur deyəndə ki, son dərəcə yüksək səslə musiqi və ifaçıların qıy-qışqırıqları ətrafdakıları bu gurultunu dinləsinlər. Əlbəttə əvvəlki vaxtlar deyil ki, hər bəstəkar qoltuğunda bir dolu qovluq aylarla, illərlə "Bədii şuraların" qapısını döyə. O, bəsdələdiyi musiqinin və yaxud mahnının nə vaxtsa səhnəyə, efirə çıxmasına çətinliklə olurdu, özü də heç şübhəsiz ki, "əsər" müvafiq senzuradan keçəndən sonra. İndi "şükürlər olsun" başqa zamanədir. Senzura ləğv edilib, mahnı yazıldığı andan ictimaiyyətin mühakiməsinə verilir. Ona görə də, "Yaşın nə fərqi var ki," kimi uğurlu əsərlər yarananda bundan hamı bəhrələnir. Yaradıcı şəxsin böyük kütlələrlə birbaşa ünsiyyətdə olmaq imkanı, onun yaşadığı cəmiyyət qarşısında da cavabdehliyini artırmalıdır. Əslində belə halda əxlaq, bəstəkar və şairin daxili senzoruna çevrilməlidir ki, araya çıxarılan mahnı və yaxud meyxana müəyyən etik tələblərə cavab verə bilsin, milli ruha, ədəbə, uyğun olsun. Bu günlərdə "20 Yanvar" metro stansiyasının yanından keçərkən olduqca bəsit melodiya ilə müşayiət edilən sözləri dinləmək məcburiyyətində qaldım. Naməlum cavan səs deyirdi (sözbəsöz eyni olmasa da mənası eynidir): - "Ana oğlun çəkib nəşəni, düşəcək kalona (!) sən də ona peredaça gətirəcəksən". Əvvəlcə, düzü, qulaqlarıma inanmadım, fəqət özümdən asılı olmadan bir neçə dəfə bu cəfəngiyyatı dinlədikdən sonra başa düşdüm ki, eşitdiyim jarqondur, oğru dili və əslində bu mətni dinləyən gənclərin kövrək mənəviyyatı anlamlarına ağır zərbədir. Əvvəla onu deyim ki, "nəşələnib kalona düşmək" arzusu ilə yaşayan cavan müvafiq leksikonla desək narkoman və deməli sağlam cəmiyyətdə yad ünsürdür.
Bu cılız insanabənzərin əcaib arzularının tirajlanması, "anasının ona peredaça gətirməyi" həsrətində olması isə tərbiyəsizliyin deyərdim ki, müdhiş nöqtələrindən biridir. Bir araya yığılmış cavanlarımız çırtma çala-çala mahnını dinləyirdilər. Oğru və quldur həyatının yalançı, iyrənc romantikasının tərənnümünə yönəlmiş səylər "münbit" zəminə düşürdü. Çünki ürək bəyəndiyini, şüuraltı idarə sisitemi dərhal yaddasa həkk edir. Vaxt gələcək, biz bunun da peşmançılığını çəkəcəyik.

Copyright©by Media LTD,2001

©WEB Design Group Media Ltd