#123(347)

Naxçıvan DİN pasport xidmətinin əməkdaşı 29 yaşlı Səbuhi Şahverdiyev muxtar respublikaya prokuror müavini təyin edilib. "Turan"ın bölgə müxbirin məlumatına görə, S.Şahverdiyev 1989-cu ildən Naxçıvan DİN sistemində çalışıb.

Oktyabrın 2-də ABŞ sentyabrın 11-də baş vermiş terror aktlarının təhqiqatının nəticələri və onun tördilməsində məsuliyyət daşıyanlar barədə NATO-ya məlumat verib. Bu barədə NATO baş katibi Corc Robertsonun dünənki bəyanatında bildirilir. Onun sözlərinə görə, terror aktlarının təşkilatçıları və iştirakçıları haqda məlumatın mənbəyi Dövlət Departamenti rəhbərliyidir. Əldə edilmiş məlumatlardan bəlli olur ki, terror aktlarını Üsəma ben Ladenin başçılıq etdiyi "Əl-Kaeda" təşkilatı törədib. "Faktlar aydın və hərtərəflidir," - deyə bəyanatda vurğulanır. C.Robertson bildirir ki, baş verənlərə NATO üzvlərindən birinə qarşı təcavüz kimi baxılmalıdır, eyni zamanda Şimali Atlantika müqaviləsinin 5-ci maddəsinə uyğun olaraq alyansın bütün üzvlərinə hücum kimi qiymətləndirilir.

Ötən bazar günü Azərbaycan Silahlı Qüvvələri Ehtiyatda olan Zabitlər Konfederasiyasının 1-ci qurultayı keçirilib. Tədbirdə Konfederasiyanın 3 illik fəaliyyəti haqqında məruzə və Nəzarət Təftiş Komissiyasının hesabatı dinlənilib. Konfederasiyanın yeni İdarə Heyəti formalaşdırılıb. Ehtiyatda olan general-mayor Dadaş Rzayev quruma sədr seçilib. Qurultay iştirakçıları prezident H.Əliyevə müraciət edərək, ordu quruculuğunda yaxından iştirak etməyi, xüsusilə də hərbi qulluqçular arasında vətənpərvərlik ruhunun artırılması üçün öz köməklərini təklif ediblər.

Türkiyə Silahlı Qüvvələri Baş Qərargahının sədri Hüseyn Kıvrıkoğlu Türkiyə və Rusiyanın Orta Asiya bölgəsində terrorçuluqla mübarizə sahəsində əməkdaşlıq etməsinin zəruriliyini vurğulayıb. Əfqanıstanı "terrorizm yuvası" adlandıran Kıvrıkoğlu qeyd edib ki, həmin ölkədə hərtərəfli quru əməliyyatlarının aparılması ideyası çox böyük səhvdir və iri miqyaslı canlı itkilərlə nəticələnə bilər. Türkiyə Baş qərargah rəisinin fikrincə, terrorçuların əsas dayaqları yalnız aviasiya və dəniz qüvvələri tərəfindən həyata keçiriləcək raket-bomba zərbələrilə məhv edilməli, quru əməliyyatlarının yalnız bir növündən - xüsusi təyinatlıların bölgəyə yeridilməsindən istifadə edilməlidir.

Əfqanıstanın Taliban hökumətinin artilleriyası Pakistan ərazisinə iki raket atıb. Mərmilər Bəlucistan əyalətinin Çəmən şəhərindəki nəzarət-buraxılış məntəqəsinin yaxınlığına düşüb. Bundan bir qədər sonra Əfqanıstan hökuməti İslamabaddan üzr istəyib və raket zərbələrinin Pakistan ərazisinə "təsadüfən" düşdüyünü bildirib. İslamabad bu üzrxahlığı qəbul edib. Bütövlükdə Əfqanıstan - Pakistan sərhədində gərginlik xeyli artıb. Sərhədin hər iki tərəfində qoşunlar yüksək döyüş hazırlığı səviyyəsinə gətirilib. Taliban cənub sərhədi boyunca güclü ağır artilleriya, hava hücumundan müdafiə vasitələri, raket kompleksləri yerləşdirib.

"New Üork Times" qəzeti yaxır ki, 2001-ci ilin sentyabrında ABŞ administrasiyası hazırda İsrailə məxsus olan torpaqlarda Fələstin dövlətinin yaradılması zərurətini tanıyan sensasiyalı bəyanatla çıxış etməyə hazırlaşırmış, amma 11 sentyabr hadisələri Vaşinqtonun bu istəyini təxirə salıb. Xəbər verilir ki, ABŞ dövlət katibi Kolin Pauell BMT-nin 56-cı sessiyasının əsas hissəsinin açılış mərasimində Fələstin dövlətinin yaradılması tezisini ortaya qoymalı imiş. Sonradan Baş Assambleyanın sessiyası çərçivəsində keçirilməli olan "liderlər görüşü" qeyri-müəyyən vaxtadək təxirə salındı.

Vaşinqton hərbi ekspertlərinin ölkənin hərbi-strateji icmalı ilə bağlı rüblük hesabatında deyilir ki, NATO və Rusiya arasında əməkdaşlıq üçün əlverişli şərait yaranıb. Sənədin müəllifləri diqqəti belə bir məqama yönəldirlər ki, Balkanlar istisna olmaqla bütün Avropa sülh şəraitində yaşayır. Mərkəzi Avropa dövlətləri Qərbə inteqrasiya prosesini möhkəmləndirirlər. Rusiyaya gəlincə, Hesabatda bildirilir ki, "Moskva NATO üçün ciddi təhlükə törətmir". Hesabat müəlliflərinin fikrincə, hazırda Rusiya bir çox sahələrdə, o cümlədən beynəlxalq terrorizmlə mübarizədə ABŞ-la oxşar mövqedən çıxış edir.

Əfqanıstanın "Şimal alyans"ı ABŞ-la birgə hərbi əməliyyatlarda iştirak etmək istədiyini bəyan edib. Alyansda onu bildiriblər ki, amerikalıların dinc əfqan xalqına qarşı hücum əməliyyatları keçirməsinə razı olmayacaq. "Şimal alyansı" əfqan xalqının özünün də terrorçuluğun qurbanı olduğunu xatırladıblar. Bununla belə, Şimal Alyansı Vaşinqtonun ABŞ-da baş verən məlum terror aktlarına görə cavab əməliyyatı keçirmək haqqını tanıdığını bildirib.

Yaponiya xarici işlər naziri xanım Makiko Tanaka etiraf edib ki, Nyu-York və Vaşinqtonda törədilən partlayışlardan dərhal sonra ABŞ Dövlət Departamenti işçilərinin Vaşinqtondan Virciniya ştatındakı Arlinqton dairəsinə köçürülməsi haqda məlumatları mətbuata ötürdüyünü etiraf edib. Nazir böyük diplomatik səhvə yoldiyini boynuna alıb. O dəqiqələrdə ABŞ hökuməti neçə təyyarənin qaçırıldığını müəyyənləşdirməmişdi. Və xanım Tanakanın açıqlamaları terrorçular üçün əsil kəşfiyyat materialı ola bilərdi.

ABŞ prezidenti Corc Buş terrorçular, terror təşkilatları və mütəşəkkil cinayətkarlıqla bağlı olan struktur və şəxslər haqda vacib informasiya verən adamlara Birləşmiş Ştatlarda yaşamaq haqqı verəcək qanuna imza atıb. ABŞ-ın İmmiqrasiya İdarəsi bu sahədə Vaşinqtonla əməkdaşlıq edən adamlara xüsusi vizalar verəcək. Vizaların sayına məhdudiyyət qoyulub - ildə yalnız 250 nəfər öz xidmətləri müqabilində ABŞ sakini olmağa ümid edə bilər.

AŞPA-dakı Ermənistan nümayəndə heyətinin üzvü Armen Rüstəmyan Parlament Assambleyasının iclasında Gürcüstanın Cavahetiya bölgəsi əhalisinin öz müqəddəratını təyin etməsi hüququna dair məsələni qaldırdığını danır. Erməni deputatının sözlərinə görə, o yalnız milli azlıqların öz müqəddəratını təyin etməsi haqqının olması məsələsini qabardıb, bu isə AŞ-nin prinsiplərindən irəli gəlir. Rüstəmyan AŞPA-dakı çıxışından sonra Gürcüstan nümayəndə heyətinin azərbaycanlı həmkarları ilə daha da yaxınlaşması faktını etiraf edib. Erməni deputatı Azərbaycan-Gürcüstan münasibətlərindəki yaxınlaşmanı daha çox həmin ölkələrin geopolitik maraqlarının üst-üstə düşməsi ilə əlaqələndirib.

Səudiyyə Ərəbistanı Əfqanıstana 10 milyon dollar dəyərində təcili humanitar yardım göstərəcək. Bu barədə ölkənin kralı Fəhd göstəriş verib. BMT baş katibi Kofi Annan ötən həftə Əfqanıstandakı humanitar vəziyyətin acınacaqlı olduğunu bildirib, dünya dövlətlərini və humanitar təşkilatları bölgəyə 584 milyon dollarlıq yardım göstərməyə çağırmışdı. Yeri gəlmişkən, dünən ABŞ əfqanlara 100 milyon dollarlıq yardım göstərəcəyini bəyan edib.

Gürcüstan prezidenti Eduard Şevardnadze dünən işgüzar səfərlə ABŞ-a gedib. Şevardnadzenin ABŞ prezidenti Corc Buşla görüşü oktyabrın 5-nə planlaşdırılıb. O, Vaşinqtonda ABŞ vitse-prezidenti Riçard Çeyni, dövlət katibi Kolin Pauell və müdafiə naziri Donald Ramsfeld ilə danışıqlar aparacaq. Prezident Nümayəndələr Palatası və Senatın rəhbərliyi, habelə işgüzar dairələrin nümayəndələri ilə görüşəcək. Səfər çərçivəsində E.Şevardnadzenin başçılıq etdiyi nümayəndə heyətinin BMT rəhbərliyi ilə danışıqlar aparacağı da gözlənilir. Bundan əlavə, Gürcüstanın dövlət başçısı Harvard Universitetinin auditoriyası qarşısında məruzə ilə çıxış edəcəkdir. Məlumat üçün deyək ki, Şevardnadze bu universitetin "Fəxri doktoru"dur.

Rusiya Silahlı Qüvvələri Baş Qərargahının rəisi Anatoli Kvaşnin dünən işgüzar səfərlə Yerevana gəlib. Ordu generalı "Zvartnots" hava limanında jurnalistlərə bildirib ki, səfər əvvəlcədən planlaşdırılmış protokola uyğundur. Danışıqların əsas mövzusu Ermənistanla Rusiya arasında hərbi əməkdaşlığın perspektivi məsələsidir. Səfər çərçivəsində general Gümrüdəki 102-ci Rusiya hərbi bazasını ziyarət edəcək.

Oktyabrın 10-da Qatarda İran və Sudanın təşəbbüsü ilə İslam Konfransı Təşkilatına (İKT) daxil olan 57 ölkənin xarici işlər nazirlərinin görüşü keçiriləcək. Yaxın Şərq ölkələri ABŞ-dakı terror aktlarını pisləsələr də, əksəriyyət Vaşinqtonun antiterror əməliyyatına ehtiyatla yanaşır. Taliban hökuməti İKT rəhbərliyinə müraciət edərək Amerikadakı hadisələrin günahkarlarının tapılıb mühakimə edilməsində köməklik göstərilməsini xahiş edib.

Qaradağ-"Şimal" DRES qaz kəmərinin çəkilişi ətrafında yaranmış qalmaqallı vəziyyətlə əlaqədar Yaponiyanın Beynəlxalq Əməkdaşlıq Bankının (YBIC) nümayəndələri Bakıya gəlib. Bu barədə daxil olan məlumata görə, YBIC iki dəfə "Azəriqaz" Qapalı Tipli Səhmdar Cəmiyyətinə məktub göndərərək qaz kəmərinin çəkilişi üzrə keçirilmiş tenderin qalibini tanımadığını bəyan edib. Lakin tender komissiyası Nirron Steel-Sumitomo Corroration yapon şirkətləri alyansının xeyrinə yeni-yeni arqumentlər tapıb. YBIC rəhbərliyi qalmaqallı vəziyyətlə yerində tanış olmaq üçün öz nümayəndələrini Bakıya göndərmək məcburiyyətində qalıb. Cəmi iki gün Azərbaycanda olacaq nümayəndələr baş nazirin müavini Abid Şərifov və "Azəriqaz" QSC-nin prezidenti Əlixan Məlikovla görüşmək niyyətindədir.
Abid Şərifov jurnalistlərlə söhbət zamanı tenderin qalibinin seçilməsində guya, ədalətsizliyə yol verilməsi ilə bağlı yayılan məlumatlara münasibətini açıqlayıb. Bildirək ki, yayılan məlumatlara görə, Nirron Steel-Sumitomo Corroration qaz kəmərinin çəkilişi ilə əlaqədar tenderə ən yüksək məbləğ təklif edib. Lakin Abid Şərifov bu məlumatları təkzib edərək bəyan edib ki, tenderin qalibinin seçiləcəyi barədə danışmaq hələ tezdir. Çünki "Tender haqqında" qanuna əsasən tenderin qalibi 90 gün ərzində müəyyənləşməlidir.
Tender komissiyasının sədri Nazim Səmədzadə məlumat vermişdi ki, tenderin nəticələri yekunlaşdırılaraq YBIC-ə göndərilib. O da məlumdur ki, YBIC tenderdə niyə məhz sözügedən alyansa üstünlük verildiyini daha ətraflı öyrənmək məqsədilə "Azəriqaz"a sorğu göndərib.

Yaxın ayyarım ərzində Azərbaycan Beynəlxalq Bankı (ABB) Moskvada özünün törəmə bankını açmağı planlaşdırır. Bu barədə məlumat verən ABB idarə heyətinin sədri Cahangir Hacıyev bildirib ki, onlar lisenziya almaq məqsədilə artıq Rusiya Mərkəzi Bankına müraciət ediblər. Rusiya Mərkəzi Bankının tələblərinə əsasən yeni açılan bankın nizamnamə kapitalı minimum 10 milyon avro təşkil etməlidir. C.Hacıyev qeyd edib ki, yeni bankın nizamnamə kapitalı, həmçinin digər xərclər yalnız ABB-nin vəsaitləri hesabına yaradılacaq. Hacıyevin sözlərinə görə, hesablamalar göstərib ki, bank qısa zaman ərzində özünü doğruldacaq. PriceWaterhouse (Moskva) konsaltinq şirkəti törəmə bankın biznes-planının hazırlanmasını başa çatdırıb.
C.Hacıyevin bildirdiyinə görə, Rusiyanın bank fəaliyyəti ilə bağlı qanunvericiliyi liberallaşdırılır, ona görə də törəmə bankın açılmasında problem yaranmayacaq. Digər tərəfdən Rusiya Mərkəzi Bankının yeni qərarına əsasən bu ölkənin vətəndaşlarına xarici banklarda hesab açmasına icazə verilib. Moskvada ABB-nin törəmə bankının açılmasına səbəb Rusiyadan Azərbaycana iri köçürmələri leqallaşdırmaqdır. Həmçinin bank Rusiyada sayı təqribən 2 milyon nəfərə çatan azərbaycanlılara xidmət göstərmək niyyətindədir. C.Hacıyevin sözlərinə görə, hazırdan Moskvadan Azərbaycana pul köçürmələrini ABŞ-ın Money Gramm və Wester Union şirkətləri vasitəsilə həyata keçirmək olar. Lakin onların xidmətləri çox baha - ümumi məbləğin 5 faizinə başa gəlir.

Oktyabr ayından başlayaraq Azərbaycan Milli Bankı 0,5 trilyon manat həcmində köhnəlmiş pul əskinaslarını məhf edəcək. Bu barədə məlumat verən ölkənin baş bankiri Elman Rüstəmov bildirib ki, yalnız dövriyyədən çıxarılmış yararsız əskinaslar aradan götürüləcək. E.Rüstəmovun bildirdiyinə görə, Milli Bankı periodik olaraq köhnə əskinasları təzələrilə əvəz edir. Belə ki, gələn ilin I kvartalında ölkəyə 1000, 10000 və 50 000 manatlıq banknotların gətrilməsi planlaşdırılır. Yeni pullar partiyalarla-yanvar, fevral və martda ölkəyə daxil olacaq. Qeyd edək ki, 2001-ci ilin yanvar-avqust ayları ərzində respublikada dövriyyəyə 5,35 trilyon manat buraxılıb.

Bu gün Bakının 34 saylı məktəbində ötən il noyabrın 25-də baş vermiş zəlzələ ilə əlaqədar bərpa işlərinin başa çatmasına həsr olunmuş təntənəli mərasim keçiriləcək. Zəlzələ nəticəsində məktəbin binasına ciddi zərər dəydiyindən, təhsil müəssisəsinin əsaslı təmirə ehtiyacı var idi. 185 və194 saylı məktəblərdə olduğu kimi burada da bərpa işlərini İrlandiyanın Robero Ltd şirkəti aparıb. Qeyd edək ki, 250 min dollarlıq bərpa işlərini ABŞ hökuməti maliyyələşdirib. Hər üç məktəbdə aparılan işlər zamanı, su, istilik sistemi dəyişdirilmiş, siniflər və idman zalları təmir olumuşdur. 34 saylı məktəbdə keçiriləcək mərasimdə ABŞ-ın Azərbaycandakı səfiri Ross Uilsonun da iştirak edəcəyi gözlənlir.

Sumqayıt şəhərində Katej adlanan bağ massivində bədəninin bir tərəfi yanmış kişi meyiti tapılıb. Mərhumun bədinində güllə yarası olduğu söylənsə də, hələlik bu barədə ekspertizanın rəsmi rəyi yoxdur. Meyitin şəxsiyyəti artıq müəyyənləşdirilib. Bu, 45 yaşlı Tahir Sultanovdur. Polislərin ölüm faktı ilə bağlı ilkin versiyası isə belədir: o, huşunu itirərək neft lampasının üstünə yıxılıb.

Copyright©by Media LTD,2001

©WEB Design Group Media Ltd