#124(348)

Xaçmazda yaşı 100-dən yuxarı olan rayon sakinləri ilə görüş keçirilib. İcra hakimiyyəti, gənclər, idman və turizm idarəsinin təşəbbüsü ilə təşkil olunan tədbirdə rayonun özündə və kəndlərində yaşayan 23 nəfər uzun ömürlü iştirak edib. Tədbirin qəhrəmanlarına maddi yardım göstərilib.

Mədəniyyət Nazirliyinin əməkdaşı Arif İbrahimov Nizami Gəncəvinin abidəsinin Sankt-Peterburqda ucaldılması ilə bağlı məsləhətləşmələr aparmaq üçün bu şəhərə yola düşüb. Xəbər verildiyi kimi, Sankt-Peterburqun mərkəzi emalatxanalarından birindən saxlanan heykəl hələ 2-3 il bundan əvvəl şəhərin mərkəzi parklarından birində ucaldılmalı idi. Lakin son mərhələdə lazımi işlər üçün vəsait ayrılmadığından abidə yerinə indiyəcən qoyulmayıb. Abidənin ilin sonunacan ucaldılacağı vəd olunur.

Dünən Gümrüdəki 102-ci Rusiya hərbi bazasında Rusiya və Ermənistanın Hərbi Hücumundan Müdafiə (HHM) qüvvələrinin birgə döyüş növbəsinin fəaliyyətə başlaması münasibəti ilə mərasim keçirilib. Mərasimdə Ermənistanda işgüzar səfərdə olan Rusiya Silahlı Qüvvələri Baş Qərargahının rəisi Anatoli Kvaşnin də iştirak edib. Rusiya Hərbi Hava Qüvvələrinin baş komandanı Anatoli Kornukov bildirib ki, birgə döyüş qarovulunun fəaliyyətə başlaması sırf müdafiə xarakteri daşıyır. Onun sözlərinə əsasən, 1995-ci ilin fevralında yaradılan MDB birləşmiş HHM sistemi çərçivəsində fəaliyyət göstərəcək birgə döyüş qarovulu nə Türkiyə, nə də NATO-ya qarşı yönəlib.

Talibanın yüksək mənsəbli nümayəndələrindən ibarət heyət İrana gəlib. Nümayəndə heyətinə qaçqınların işi üzrə dövlət naziri Abdül Rahib Taxari başçılıq edir. Səfər İran dini lideri ayətulla Əli Xameneinin dəvətindən sonra gerçəkləşib. Hazırda İranda 2 milyondan artıq əfqan qaçqınının toplandığı 8 düşərgə var. Yaponiya baş nazirinin nümayəndəsi Masaqiko Komura da İran paytaxtına gəlib. İran prezidenti Məhəmməd Xatəmi ilə görüşən Komura Yaponiya baş naziri Dzyunitiro Koidzuminin məktubunu İran rəhbərinə verib. Bu gün yapon elçisi Səudiyyə Ərəbistanı şahzadəsi Abdulla ilə görüşmək üçün Ər-Riyada getməlidir.

"Kursk" sualtı qayığının dəniz səthinə qaldırılması üzrə xüsusi təyinatlı ekspedisiyanın komandanı vitse-admiral Mixail Motsak mətbuata verdiyi açıqlamada bildirib ki, gəminin su üzünə çıxarılması oktyabrın 5-dən 6-na keçən gecəyə planlaşdırılır. O, dəqiq tarixin elan edilməsini bütün texnoloji proseslərin başa çatması ilə izah edib. Öz növbəsində Hollandiyanın "Mammoet" şirkətinin başçısı Frants van Seymeren bildirib ki, "Kursk"un dəniz səthinə qaldırılması yalnız gələn həftənin əvvəlində mümkün olacaq.

Pentaqon ehtiyatda olan daha 2263 nəfərə çağırış vərəqəsinin verilməsi ilə bağlı kampaniyaya başlayıb. Beləliklə, hərbi xidmətə çağırılan rezervistlərin ümumi sayı 22 min 400 nəfərə çatıb. Beləliklə də, ehtiyatda olan 50 minlik əsgər və zabit personalının az qala yarısı hərbi xidmətə cəlb ediləcək. Çağırışçıların bir hissəsi Əfqanıstanda aparılacaq əməliyyatlara cəlb ediləcək, bir hissəsi isə milli ərazilərin müdafiəsi üçün nəzərdə tutulan hərbi bölümlərə daxil ediləcək.

ABŞ Senatı prezident Corc Buşun xahişi ilə ölkənin raket hücumundan müdafiə sisteminin inkişafı üçün 345 milyard dollar ayırıb. Amma Senat müdafiə sistemi ilə bağlı qanunun son variantını hazırlamalıdır. ABŞ-da baş verən məlum terror aktlarından sonra demokratların mövqeyində dəyişiklik olub. Əvvəllər bu sahəyə əlavə vəsait ayrılmasına qarşı çıxan demokratlar bu dəfə Buşun raketdən müdafiə planını bəyəndiklərini bildiriblər.

Tacikistanın hüquq-mühafizə orqanları "Hizb üt-Təhrir" dini-ekstremist təşkilatının iki üzvünü həbs ediblər. Həbs edilənlərdən çoxlu ədəbiyyat, o cümlədən vərəqə və broşürlar müsadirə edilib. Tacikistan Milli Təhlükəsizlik Nazirliyi "Hizb üt-Təhrir"in digər terrorçu təşkilatlarla əlaqəli olmasını istisna etmir.

İtaliya baş naziri Silvio Berluskoni müsəlman dövlətlərinin Romadakı səfirləri ilə görüşüb. Berluskoni islamı böyük və tolerant din adlandırıb. Hökumətin görüşdən sonra yaydığı bəyanatda deyilir ki, baş nazir insan haqlarının qorunmasına və onların sülh və əmin-amanlıqda yaşamasına çağıran islam dininə ehtiramını bir daha göstərdi. Bir neçə gün öncə Berluskoninin Qərb mənəvi dəyərlərinin islam dinindən yüksək olduğunu deməsi müsəlman dövlətlərinin etirazına səbəb olmuşdu.

Gürcüstan və Türkiyənin dövlət başçıları arasında telefon danışığı olub. Tərəflər antiterror koalisiyasına yardım məsələləri, regional təhlükəsizlik və sabitlik məsələlərini müzakirə ediblər. Eduard Şevardnadze qeyd edib ki, Gürcüstan beynəlxalq terrorizmlə mübarizə sahəsində bütün qüvvəsini səfərbər etməyə hazırdır. E.Şevardnadze türkiyəli həmkarı Əhməd Necdət Sezəri Gürcüstana dəvət edib.

İranın Kürdüstan ostanından verilən xəbərlərə görə, bu ilin ilk altı ayı ərzində adı çəkilən əyalətdə fəaliyyəti İran qanunları ilə yasaqlanmış partiya və hərəkatların 18 üzvü tutulub. Onların bir hissəsini Kürd Fəhlə Partiyasının (PPK) üzvləri təşkil edir. PKK-çıların əksəriyyəti Türkiyə ərazisindən İrana keçmək istəyərkən tutulub. Bu ilin birinci yarısında yalnız Kürdüstan ərazisində 60 odlu silah müsadirə edilib.

Avropa Şurası Qazaxıstanın bu quruma müşahidəçi qəbul edilməsi xahişini rədd edib. Bu haqda məlumatı Qazaxıstanda rəsmi səfərdə olan AŞPA sədri Devid Rassel-Conston verib. Conston deyib ki, bu qərarın qəbul edilməsində Qazaxıstanda ölüm hökmünün hələ də qüvvədə qalması amili əsas rol oynayıb. Amma bu səbəb yeganə amil deyil. Rassel-Conston bildirib ki, Avropa Şurasının optimal geoqrafik həddə çatıb və onun Orta Asiyaya doğru genişlənmək əlavə problemlər yarada bilər.

Brüsseldə Avropa Birliyi-Rusiya sammiti öz işinə başlayıb. Zirvə toplantısında Rusiya prezidenti Vladimir Putin, Belçika baş naziri Gi Verxofstadt, Avropa Komissiyasının sədri Romano Prodi, habelə Avropa Birliyinin xarici siyasət və təhlükəsizlik məsələləri üzrə ali komissarı Havyer Solana iştirak edir. Vladimir Putin NATO-nun Şərqə genişlənməsi niyyətinə toxunaraq bəyan edib ki, əgər Moskva həmin prosesə bərabərhüquqlu tərəfdaş kimi cəlb olunsa, Rusiya alyansa yeni üzvlərin qəbul edilməsinə qarşı çıxmayacaq.

Diplomatik mənbələrdən əldə etdiyimiz məlumata görə, oktyabrın 10-da Qatarda İslam Konfransı Təşkilatına (İKT) daxil olan ölkələrin xarici işlər nazirlərinin sammitində Azərbaycanı ölkəmizin Səudiyyə Ərəbistanındakı fövqəladə və səlahiyyətli səfiri Həmid Araslı təmsil edəcək. Xatırladaq ki, zirvə toplantısı Əfqanıstan ətrafında yaranmış vəziyyətlə əlaqədar olaraq İran və Sudanın təşəbbüsü ilə çağrılır.

Fransanın Azərbaycandakı səfirliyinin mətbuat katibi Fuad Zərbiyev "Bizim Əsr"ə bildirib ki, bu ilin sonunadək Parisdə Fransa-Azərbaycan hökumətlərarası komissiyasının birgə iclasının keçirilməsi nəzərdə tutulur. Zərbiyevin sözlərinə görə, komissiyanın tərkibinin təyin olunmaması səbəbindən iclasın dəqiq tarixi müəyyənləşdirilməyib. F.Zərbiyev Fransanın Azərbaycana yeni təyin olunmuş səfiri xanım Şantal Puarenin etimadnaməsinin təqdimatı ilə bağlı Prezidentin İcra Aparatına müraciət edildiyini də bildirib.

ABŞ Poçt Xidməti yeni poçt markasının təqdimetmə mərasimini keçirib. İdarənin rəhbəri Con Potterin fikrincə, "United We Stand" ("Birləşib ayağa qalxaq") adlanan poçt markası insanları sülhə, azadlığa və ədalətə səsləyəcək. Potter deyib: "Hər dəfə bu markadan istifadə etdikdə əsas dəyərlərimizin sarsılmaz olduğuna inam hasil edəcəyik". Marka noyabr ayından satışa çıxarılacaq.

ARDNŞ Bakı-Novorossiysk kəməri ilə Azərbaycan neftinin oktyabr partiyasının nəqlinə başlayıb. Oktyabrda "Şimal marşrutu" ilə 250 min ton neftin nəql ediləcəyi gözlənilir. Sözügedən partiyanı İsveçrənin Taurus Petroleum şirkəti alıb. Azərbaycan nefti yüklənmiş tankerlər 9-10 və 27-28 oktyabrda Novorossiysk limanından yola salınacaq.

Bu ilin 9 ayı ərzində ARDNŞ dənizdə və quruda yerləşən yataqlardan 6 milyon 752,5 min ton neft hasil edib. Bu da planlaşdırılandan 1,5 faiz (96,6 min ton) çoxdur. Ötən ilin müvafiq dövrü ilə müqayisədə neft hasilatı 0,2 faiz ( 14,8 min ton) artıb. Bu ilin 9 ayı ərzində qaz hasilatı isə 4 milyard 181,5 milyon kubmetr təşkil edib. Bu da planlaşdırılandan 169,9 milyon kubmetr azdır.

Salyan Oil əməliyyat şirkəti "Kürsəngi" yatağında sayca 3-cü quyunu qazacaq. Bu barədə qərar şirkətin partnyorlarının iclasında qəbul edilib. Qeyd edək ki, qazma zonası müqavilə ərazisində yerləşən "Qarabağlı" yatağında aparılmış məlumat analizləri əsasında müəyyən olunub. Layihə dərinliyi 5200 metr təşkil edən 3-cü quyunun qazılması oktyabrın sonuna planlaşdırılır.

Rusiyanın energetika naziri İqorü Yusufov keçirdiyi mətbuat konfransında bildirib ki, fəaliyyətdə olan ixrac neft marşrutlarının ciddi yenidənqurmaya ehtiyacı var. Ona görə də yeni ixrac istiqamətlərinin yaradılması paralel olaraq həmin kəmərlərin modernləşdirilməsini həyata keçirməyə imkan verəcək. Yusufovun sözlərinə görə, hazırda Rusiyadan nəql edilən ixrac neftinin bütün yolları 3-cü dövlətlər tərəfindən təsirə məruz qalır. Xüsusilə də, Novorossiysk və Tuapse limanınından keçməklə neftin Bosfor boğazından daşınması Türkiyə tərəfindən məhdudlaşdırılır.

"Qara qızıl"ın qiyməti düşdü Londonda yerləşən beynəlxalq neft birjasında "qara qızıl"ın qiyməti rekord dərəcədə aşağı düşüb. Dünən birjada "brent" tipli neftin 1 barrelinin dəyəri 21,5 dollar təşkil edib. Bu son iki il ərzində ən aşağı göstəricidir.

Copyright©by Media LTD,2001

©WEB Design Group Media Ltd