Rəsmi Tehran və İranın mətbuat orqanları sentyabrın 11-də ABŞ-da törədilən terror aktının iştirakçılarını ABŞ-ın daxilində axtarmağı tövsiyə edib və hər hansı islami qurumun bu cinayətdə əli olması haqda irəli sürülən iddiaları əcassız sayıb. Bu xəbər TURANa Bütöv Azərbaycan Birliyi mətbuat xidmətindən verilib.
Mənbənin məlumatına görə, İran Ali Təhlükəsizlik Şurasının katibi Həsən Ruhani "Keyhan" qəzetinə müsahibəsində bildirib ki, "ABŞ-da baş vermiş bu terror bütün dünya ölkələrinə xəbərdarlıq və dərs olmalıdır ki, zülm və ədalətsizliyin hökm sürməsi terror əməllərinin baş verməsinə səbəb olur". "Tehran fəzası" qəzeti isə terroru sionistlərin törətdiyini iddia edib. İran rəsmisi Məhəmməd Rza Tacik də terrorda İsrailin əli olduğunu vurğulayıb. Digər İran rəsmi nümayəndəsi Möhsün Armi ABŞ idarəetmə sisteminə dərindən nüfuz edən və məlumatlı adamların bu terrordan xəbəri olduğunu deyib.

Prezident Vladimir Putinlə birgə Ermənistana gəlmiş Rusiya rəsmi şəxsləri cib telefonlarında Türkiyə telefon şirkətinin salamını görəndə xeyli təəccübləniblər.
Məlum olub ki, bu ölkənin telekommunikasiya bazarında inhisarçı olan "Armentel" Ermənistan-Yunanısnan birgə müəssisəsinin Rusiyanın iri telekommunikasiya şirkətləri ilə rouminq üzrə müqaviləsi yoxdur. Bu səbəbdən də Ermənistanda xarici qonaqların cib telefonlarına rouminq xidmətləri Türkiyə şirkətləri vasitəsilə göstərilir. Rouminq - ingilis sözü olub azərbaycanca "səyahətə çıxmaq" mənası verir. Bu xidmət abonentlərə cib telefonundan ölkə xaricində də istifadə etmək imkanı yaradır.

Bu gün ABŞ-da törədilən terror aktlarına cavab zərbələri endirilə bilər. Dünən Sakit və Hind okeanlarında müttəfiqlərin hərbi kreyser və gəmilərinin qruplaşması müşahidə edilib. Əvvəlcə ABŞ Hərbi Dəniz Donanmasının bir kreyseri Yaponiyadakı bazadan hərəkətə başlayıb. Daha sonra Böyük Britaniyaya məxsus olduğu güman edilən altı hərbi gəmi Süveyş kanalını keçib.

Dünən Bakıya səfərini başa vuran Avropa Şurası Parlament Assambleyasının sədri lord Rassel Conston Azərbaycanın AŞ qarşısında götürdüyü öhdəliklərə əməl etməsini yüksək dəyərləndirib. Rassel Constonun sözlərinə görə, səfər gedişində həmin öhdəliklər siyahısı bir daha nəzədən keçirilib: "Azərbaycan bu istiqamətdə tədricən və stabil olaraq irəliyə doğru hərəkət edir". Öz növbəsində prezident Heydər Əliyev Azərbaycanın Avropa Şurası önündə götürdüyü bütün öhdəliklərə axıracan riayət edəcəyini vurğulayıb. "Biz Avropa Şurasının ədalətli tənqid və iradlarını qəbul edirik, lakin eyni zamanda təşkilatı da Azərbaycanın probleminə diqqətcil olmağa çağırırıq" deyə prezident bildirib.

Dünən Rusiya prezidenti Vladimir Putinin Ermənistana səfəri başa çatıb. Səfərin yekunlarına dair imzalanan siyasi kommünikedə Rusiya və Ermənistanın strateji tərəfdaş olduğu bir daha vurğulanır. Putin Rusiyanın Ermənistanın regional təhlükəsizliyinə təminat verəcəyini bəyan edib. Putin həmçinin qeyd edib ki, Rusiyanın Türkiyəyə hərbi texnika satması ilə bağlı Ermənistanda yaranmış narahatçılıq əssasızdır. Onun sözlərinə görə, həmin silahlar Türkiyənin hərbi gücünə elə bir təsir etməyəcək. Qarabağ tənzimlənməsinə toxunan Rusiya prezidenti "Kompromiss həlli və statusu tərəflərin özü tapmalıdır. Bu məsələdə Rusiyadan hansısa resept gözləmək yanlışlıqdır" deyə əlavə edib.

Qafqaz Müsəlmanları İdarəsinin (QMİ) başçısı, şeyxülislam Hacı Allahşükür Paşazadə Ermənistanın xristianlığı dövlət dini kimi qəbul etməsinin 1700-cü ildönümü münasibətilə Yerevanda keçiriləcək tədbirlərdə iştirak etməyəcək. QMİ-dən verilən məlumata görə, A.Paşazadə bu barədə bütün ermənilərin katalikosu II Qareginə rəsmi məktub göndərəcək. Xatırladaq ki, Şeyxülislamı sentyabrın üçüncü ongünlüyündə Yerevanda keçiriləcək bayram təntənələrinə II Qaregin dəvət edib.

Fransanın ölkəmizdəki yeni səfiri xanım Şantal Puare sentyabrın 17-də Bakıda olacaq. O, 1996-cı ildən Fransanın Bakıdakı diplomatik nümayəndəliyinə başçısı vəzifəsində çalışan Jan-Pyer Ginyütü əvəz edəcək. Azərbaycan XİN-dən verilən məlumata görə, Bakıya təyinat alanadək xanım Puare Fransanın BMT yanında daimi nümayəndəsi olmuş, Fransa XİN-də beynəlxalq təşkilatlar şöbəsində işləmişdir.

"Bizim ƏSR"in 13 sentyabr 2001-ci il tarixli sayında dərc olunmuş "Bakı kompüter kollecində qalmaqal" sərlövhəli yazı ilə əlaqədar redaksiyamıza məktub daxil olub. Məktub müəllifləri ləğv edilmiş Bakı Kompüter Litseyinin bir qrup şagirdinin və onların valideynlərinin Bakı Kompüter Kollecinin direktoru Bilal Hüseynova qarşı ittihamları ilə razılaşmırlar.
Obyektivlik prinsiplərini əldə əsas tutan "Bizim ƏSR" əks tərəfin - Bakı Kompüter Kollecinin 19 nəfər əməkdaşının mövqeyini də dərc etməyi qərara aldı. Məktubda aşağıdakılar bildirilir: "Kompüter litseyinin kollecə çevrilməsi Nazirlər Kabinetinin 30.06.2001-ci il tarixli 118 saylı qərarı ilə edilib.
İslahatlar çərçivəsində və bazarın tələbatını nəzərə alaraq kompüterlərdə işləmək üçün daha savadlı mütəxəssislərə ehtiyac duyulurdu.
Buna görə də Nazirlər Kabinetinin 118 və Təhsil Nazirliyinin 810 saylı müvafiq əmrinə əsasən Bakı Kompüter Kolleci yaradıldı. Litseyin yüksək texniki təminatı olması da nəzərə alındı. Litseyin bazasında kollec yaradıldığı üçün 189 nəfər şagird təhsilini davam etdirmək məqsədi ilə Bakının 7 və 13 saylı peşə litseylərinə keçib. Nəticə etibarı ilə şagirdlər heç nədə uduzmayıb və təhsillərini analoji tədris müəssisələrində davam etdirəcəklər. Və bu səbəbdən həmin litseylərin texniki təchizatı müvafiq olaraq tamamlanıb.
May ayının təqaüdləri isə keçmiş litseyin rəhbərliyindən asılı olmayan səbəblərdən gecikdirilmiş və oktyabrın əvvəllərində tələbələrə veriləcək. Kollektiv üçün ayrılmış 10 ədəd müasir kompüter və rəngli lazer printeri hal-hazırda kollecdədir və texniki nəzarət sona yetən kimi (sentyabrın 15-ə kimi) şagirdlərin istifadəsinə veriləcək.
Şagirdlərdən rüşvət aldığını iddia edən Z.Hüseynovanı isə Bilal Hüseynov məhkəməyə verəcək. B.Hüseynov Azərbaycan üçün orta ixtisas təhsilli kompüter mütəxəssisləri hazırlanması proqramını həyata keçirir və bu iş ümumilikdə təhsil islahatları ilə üst-üstə düşür. Bizim kollektivin üzvləri hesab edirlər ki, mətbuat konfransının təşkilatçıları həqiqəti şüurlu surətdə təhrif ediblər. Şagirdlər nə üçün təqaüd almayıb? Çünki Kompüter Kolleci büdcədən maliyyələşən təşkilatdır. Büdcədən vəsait ayrılan kimi, şagirdlər oktyabr ayının əvvəllərində bütün təqaüd borclarını alacaqlar. Bu işdə "Bizim ƏSR"in prinsipial mövqedən çıxış edəcəyinə ümidvar olaraq xahiş edirik ki, bizim kollektivin də rəyini öz qəzetinizdə çap edəsiniz".