ABŞ-ın taliban hökumətinə verdiyi 72 saatlıq ultimatumun vaxtı dünən gecə başa çatdı. Əfqanıstanın Ağsaqqallar Şurası uzun müzakirələrdən ben Ladenin təhvil verilməsi ilə bağlı yekun qərarını bu günə saxlayıb. Elə dünən taliban rejimi ABŞ rəhbərliyi ilə danışıq aparmaq niyyətini bildirsə də, Vaşinqton bunu rədd edib. Prezident Corc Buş "hətta ben Laden təhvil verilsə də, əməliyyat keçiriləcək" deyərək, Əfqanıstandakı terrorizm yuvasını darmadağın etmək qətiyyətini dilə gətirib.
Konqres "Lütfkar qartal" əməliyyatının həyata keçirilməsi ilə bağlı prezidentə müstəsna səlahiyyət verib. Konqresmenlər əməliyyatın maliyyələşdirilməsi üçün dövlət büdcəsindən istənilən qədər vəsait ayrılmasını da qərara alıblar. Dünən axşam Vaşinqtonda bir araya gələn Rusiya xarici işlər naziri İqor İvanov və ABŞ dövlət katibi Kolin Pauell antiterror əməliyyatlarını koordinasiya olunması barədə razılıq əldə ediblər. Pakistan prezidenti Pərviz Müşərrəf dünən ölkə əhalisinə müraciət edərək, milli maraqlar naminə "Lütfkar qartal" əməliyyatına şərait yaradılacağını bildirib. Dəhşətli müharibə qorxusu minlərlə əfqanı qonşu ölkələrin sərhədlərinə üz tutmağa məcbur edib.

Pakistan prezidenti Pərviz Müşərrəf məlumat verib ki, amerikalıların qisas aksiyasının əsas hədəfi taliblərin Qəndahardakı mənzil-qərargahı və Kabilda bəzi hökumət binaları olacaq.
Paytaxtın ərəblər yaşayan rayonları da bu sıradadır. Cəlalabad hava limanı başda olmaqla Əfqanıstanın 18 aerodromu mümkün hədəflər sırasında yer alır. ABŞ taliblərin hərəkətinin qarşısını almaqüçün ən iri körpülərə zərbələr endirmək niyyətindədir. Pakistan hərbi əməliyyatlarda istənilən səviyyədə iştirakı təkzib edir. Ölkənin XİN başçısı Əbdül Səttar bildirib ki, heç bir Pakistan əsgəri ölkədən kənar hərbi əməliyyatlarda iştirak etməyəcək. Vaşinqton ABŞ-da törədilən terror aktlarında şübhəli bilinən 18 nəfərin siyahısını yoxlanmaq üçün Bosniya və Herseqovinaya göndərib. Təxminən 30 ölkəyə analoji siyahılar göndərilib. Hazırda Sarayevoda naturalizasiya komissiyası 1992-95-ci illərdə vətəndaş müharibəsi zamanı Bosniya və Herseqovinada vətəndaşlıq alan 11 min nəfəri yoxlayır. Onların 95 faizi artıq yoxlanılıb və ərəb ölkələrini təmsil edən 420 min nəfərin sözügedən ölkələrdə vətəndaşlıq alması aşkar edilib.

ABŞ-ın Bakıdakı səfiri Ross Uilson prezident Heydər Əliyevə məktub göndərib. Bu barədə dövlət başçısının mətbuat xidməti məlumat yayıb.
Məktubda ABŞ-da baş vermiş terror aktları nəticəsində çoxsaylı insan tələfatı ilə bağlı başsağlığına görə ABŞ xalqı və hökuməti adından Azərbaycan xalqı və hökumətinə minnətdarlıq bildirilir. Məktubda qeyd olunur ki, prezident Corc Buş terrorizmlə mübarizə məsələsində Azərbaycan rəhbərliyinin dəstək və həmrəyliyindən çox razıdır. Həmçinin deyilir ki, yaxın vaxtlarda ABŞ Azərbaycanla sıx əlaqələr quraraq belə cinayətlərin açılması, günahkarların cəzalandırılması ilə bağlı iş aparmaq, beynəlxalq terrorizmin bütün təzahürlərinə son qoymaq məqsədilə koalisiyada fəal iştirak etmək niyyətindədir.

Bakıya səfəri zamanı Azərbaycanda siyasi məhbusların olmadığını bəyan etmiş Avropa Şurası Parlament Assambleyasının baş katibi lord Rossel Conston ölkəmizin hüdudlarını adlayan kimi paradoksal açıqlama verib.
Azərbaycan və Ermənistanda "siyasi məhbus" probleminin mövcudluğunu iddia edən Conston Avropa Şurasının buna görə cəza tətbiq etmək niyyətində olmadığını bildirib. AŞPA baş katibinin ziddiyyətli bəyanatları Azərbaycanı bu təşkilatda təmsil edən nümayəndə heyəti üzvlərinin də təəccübünə səbəb olub. "Avropa Şurasının sessiyasında iştirak etmək üçün bu həftənin şənbə günü yola düşürük. Gələn həftə isə AŞPA-nın payız sessiyası öz işinə başlayır. Ona görə də gəlin tələsməyək. Orada Azərbaycanda siyasi məhbusların olub-olmaması məruzə dinləniləcək. Rossel Constonun bu ziddiyyətli bəyanatının səbəbləri də bizə orada bəlli olacaq. İndiki halda isə mülahizələrlə danışmaq istəməzdim"- deyə, millət vəkili Rəfael Hüseynov "Bizim ƏSR"in müxbiri ilə söhbətində deyib. O, ermənilərin adekvat addımlar atması ehtimalını diqqətə çəkərək Azərbaycan nümayəndə heyətinin AŞPA-da qaldıracağı məsələlər barədə məlumat verməkdən də imtina edib. Azərbaycanı AŞPA-da təmsil edən digər millət vəkili Qulamhüsen Əliyev isə Rossel Constonun Azərbaycanda verdiyi bəyanatı tələskənlik sayır: "O, "Azərbaycanda siyasi məhbus yoxdur" deyəndən sonra bildirmişdi ki, bu məsələ hələ araşdırılmalıdır, guya o, müstəqil ekspertlərin rəyi ilə tanış deyil. Hesab edirəm ki, o müstəqil ekspertlərin rəyi ilə tanış olmamış belə bir bəyanat verməməliydi. Ümumiyyətlə, Rossel Conston sonradan Azərbaycanda verdiyi bəyanatın düzgün olmadığını başa düşüb". Qulammhüsen Əliyevin məlumatına görə, AŞPA-nın sessiyasında Azərbaycanla bağlı hansısa məsələnin qaldırılması nəzəşrdə tutulmayıb: "Yəqin ki, siyasi məhbuslarla bağlı AŞPA-nın insan haqları və hüquq komissiyası öz rəyini bildirəcək. Həmin komitədə isə indiyə qədər müzakirələr aparılmayıb".

Demkonqres (islahatçılar) Məclisinin sentyabrın 22-də keçiriləcək toplantısında fövqəladə hansısa qərar qəbul edilməyəcək. AXCP mətbuat xidmətinin rəhbəri İshaq Əvəzoğlu "Bizim ƏSR"ə açıqlamasında belə deyib.
Onun sözlərinə görə, Məclis üzvləri ölkədə və beynəlxalq arenadakı ictimai-siyasi durum, müxalifətdaxili münasibətlər müzakirə olunacaq. Eləcə də Demkonqres komissiyalarının formalaşdırılması istiqamətində işlər davam etdiriləcək. İshaq Əvəzoğlu Demkonqres Məclisinin kütləvi aksiyalarla bağlı qərar verəcəyi barədə yayılan məlumatları təkzib edib. Onun sözlərinə görə, müxalifətin kütləvi aksiyalara başlamasına zəmin ola biləcək elə bir ciddi hadisə yoxdur. O, həmçinin ADP-nin keçirəcəyi aksiyaların uğursuzluqla nəticələnəcəyini iddia edib: "Mitinq xatirinə mitinq keçirmək istəmirik. Hesab edirik ki, mitinqin keçirilməsi üçün gündəmdə hansısa motiv olmalıdır. Bu olmadığı üçün keçiriləcək aksiyaları da siyasi spekulyasiya sayıram. Məsələn, bu gün ADP-nin yürüş-mitinq keçirmək istəyi bizə gülməli görünür. Çünki onların heç bir sosial dayağı yoxdur. Ötən mitinqlərdə də gördük ki, Sərdar Cəlaloğlu beş-on nəfər qohum-əqrəbasını başına yığıb polisə döydürür. Belə hallar ictimaiyyətdə mitinqlərə qarşı ikrah hissi yaradır. Sadəcə olaraq onlar mitinqləri hakimiyyətə gəlmək üçün vasitə sayırlar. Ancaq artıq həmin dövr bitib".

Demkonqresdə kütləvi aksiyaların keçirilməsi istiqamətində müzakirələr davam etsə də, hələlik konkret nəticə yoxdur.
Bunu AXCP (klassiklər) sədrinin müavini Zəlimxan Məmmədli müxbirimizlə söhbətində deyib. Müsavat Partiyasının kütləvi aksiyaların keçirilməsində maraqlı olmaması barədə yayılan məlumatları təkzib edən Məmmədlinin sözlərinə görə, yaxın vaxtlarda Demkonqresin mövqeyi bəlli olacaq. AXCP-nin Demkonqresdən kənarda kütləvi aksiyaların keçirilməsinə hazırlıq üzrə təşkilat komitəsi yaratmasına gəlincə, Zəlimxan Məmmədli bunun hansısa problem yaratmadığını bildirir: "Siyasi blokda daxil olmaqla hüquqlarımızı itirməmişik. Demkonqresdəki müzakirələr bir nəticə verməsə, o zaman öz mövqeyimizi bildirəcəyik".

Biləcəri qəsəbəsində yerləşən "N" hərbi hissənin qərargah rəisi, mayor Yalçın Bağırov intihara cəhd göstərib. Əldə etdiyimiz məlumata görə, o, qolunun damarlarını doğradıqdan sonra bıçaqla boğaz nayihəsinə də xəsarət yetirib.
Özünə qəsd edən zabit sonradan qışqıraraq qonşuları köməyə çağırıb. Onu dərhal hərbi hospitala çatdırıblar. "Lider" TV-yə hərbi hospitaldan verilən məlumata görə, çoxlu qan itirdiyindən Yalçın Bağırovun səhhəti ağırdır. Amma həkimlər onun sağalacağına ümid bəsləyirlər. Hadisə baş verən zaman mayor Bağırovun ailə üzvləri evdə olmayıb. Sözügedən hərbi hissədəki mənbə "Lider" TV-yə bildirib ki, qərargah rəisi hadisədən bir neçə gün əvvəl ailəsini əvvəllər yaşadığı Lənkəran rayonuna yola salıbmış. Həmin mənbənin ehtimalına görə, zabitin intihara əl atmasının səbəbi onun xidməti vəzifəsini itirmək qorxusu ilə əlaqədardır. Belə ki, təxminən, bir neçə ay bundan əvvəl qərargah rəisi təyin edilən Yalçın Bağırova vəzifədən çıxarılıcağı barədə xəbərdarlıq edilibmiş. Zabitin məhz bu xəbərdarlığa etirəz əlaməti olaraq özünə qəsd etdiyi güman olunur. Faktla bağlı Bakı qarnizonu hərbi prokurorluğunda istintaq işi başlanıb. Müdafiə Nazirliyi mətbuat xidmətinin rəhbəri polkovnik Ramiz Məlikov bu hadisənin sentyabrın 17-də baş verdiyini bildirsə də, onun səbəbləri barədə məlumatsız olduğunu deyib. O, Yalçın Bağırovun səhhəti ilə bağlı təhlükə olmadığını vurğulayıb və "intihar əl atan zəif adamı mövzu obyektinə çevirməməyi" tövsiyə edib.

Noyabrın 1-20-də Azərbaycanda keçiriləcək Coorerativ Determination - 2001 komanda-qərargah təlimlərində iştirak edəcək NATO bölmələrindən biri Naxçıvan Muxtar Respublikasına gələcək. "Turan"ın bölgə müxbirinin məlumatına görə, NATO hərbçilərinin Naxçıvan səfəri çərçivəsində dünən Azərbaycan Müdafiə Nazirliyinin bir qrup zabiti Naxçıvanın hərbi hissələrində olub.