Əfqanıstan ətrafında durumun kəskinləşməsi və ABŞ-ın terrorçu bazalarına zərbələr endirməyə hazırlaşması ilə əlaqədar Qəbələ radiolokasiya stansiyası (RLS) yüksək hazırlıq vəziyyətinə gətirilib.
"Turan"ın bu barədə yaydığı məlumata görə, yerli sakinlər bildiriblər ki, sentyabrın 16-dan RLS ərazisi tünd rəngli dumana bürünüb. Sakinlərin fikrincə, bu, obyektin fəaliyyəti nəticəsində əmələ gəlib. Onkoloji və ürək-damar xəstəliklərindən əziyyət çəkənlərin səhhətinin kəskin pisləşməsi də RLS-in fəaliyyətini canlandırmasından xəbər verir. Hər dəfə RLS aktiv rejimdə işləməyə başlayanda belə hallar baş verir. Qəbələ RLS-in aktiv iş rejiminə keçməsi faktını Azərbaycan Müdafiə Nazirliyində də təsdiq ediblər. "Lider" TV-nin "Səda" proqramı nazirlikdəki mənbələrə istinadən dünən xəbər verib ki, RLS-də bütün modullar işə salınıb. Əvvəllər stansiyanın modulları 30 faiz gücü ilə işlədilirdisə, indi tam qüvvə ilə işlədilir. Belə olan halda RLS nəzarət etdiyi trayektoriyada bütün hərəkətləri detallarına qədər izləyir. Hərbi obyektin modulları işləyəndə isə, istər-istəməz, həm təbiətə, həm də canlı orqanizmlərə mənfi təsir göstərir. Qəbələ RLS-nin ətraf mühitə vurduğu ziyanı araşdıran ikitərəfli komissiya stansiyada iş apararkən ruslar modulların 80-90 faizini söndürüblər. Stansiya tam gücü ilə işə salınaraq yoxlanmayıb, əgər yoxlansaydı, onun hansı mənfi izlər buraxdığı asan və tezliklə aşkara çıxardı.
Əlavə edək ki, Rusiya Qəbələ RLS-də həyata keçirdiyi tədbirləri Azərbaycanla razılaşdırılır. "Səda"nın müxbirləri stansiyanın yüksək hazırlıq vəziyyətinə gətirilməsi ilə bağlı ölkəmizdən razılıq alınıb-alınmadığını dəqiqləşdirə bilməyiblər. Rusiyanın strateji obyekti olan Qəbələ RLS Bakının 210 km.-də yerləşir. Stansiya Cənub yarımkürəsində qitələrarası ballistik raketlərin uçuşunu izləyr. Obyektdən İran-İraq müharibəsi dövründə, NATO-nun "Səhrada fırtına" əməliyyatı, həmçinin digər hərbi böhranlar zamanı texniki kəşfiyyat məqsədilə istifadə olunub. Qəbələ RLS-in yenidən tam gücü ilə işə salınması ABŞ-ın düzənləyəcəyi hərbi əməliyyatdan Rusiyanın ciddi şəkildə narahat olduğunu göstərir. Moskva Pentaqonun regionda gözlənilən manevrlərini daha yaxından izləmək niyyətindədir. Bu, Qəbələ RLS-in Rusiya üçün nə dərəcədə strateji əhəmiyyətli obyekt olduğunu bir daha təsdiqləyir.

İran hökuməti səfirlik kompleksinin tikilməsi ilə əlaqədar Azərbaycan tərəfinə əvvəlcə təklif etdiyi ərazini ayırmaqdan imtina edib. Azərbaycanın İrandakı səfirliyinə Tehranda başqa bir ərazi axtarmaq tövsiyə oluub.
Bu barədə məlumat verən Azərbaycan Dövlət Layihə İnstitutunun direktoru Yaşar Mirzəzadənin sözlərinə görə, ötən il Azərbaycan tərəfinə 3 alternativ sahə təklif edilib. Həmin sahələrdən biri Azərbaycan tərəfindən qəbul edilib. Artıq ötən həftə tikinti üçün sahənin ayrılması məqsədilə Tehran bələdiyyəsi ilə protokol imzalanması planlaşdırılıbmış. Lakin İran qəfil həmin ərazini Azərbaycan səfirliyinə verməkdən imtina edib. İran Xarici İşlər Nazirliyi imtinanın səbəblərini izah etməyib. Qeyd edək ki, 3 hektar ərazini əhatə edəcək səfirlik kompleksində inzibati korpus, səfirin iqamətgahı, biznes və mədəniyyət mərkəzi inşa edilməlidir.

Bu gün deputat İlham Əliyevin başçılığı ilə Milli Məclis daimi nümayəndə heyəti Avropa Şurası Parlament Assambleyasının (AŞPA) növbəti sessiyasında iştirak etmək üçün Strasburqa gedəcək. Bu barədə "Turan"a nümayəndə heyəti başçısının müavini, parlamentin beynəlxalq münasibətlər və parlamentlərarası əlaqələr komissiyasının sədri Səməd Seyidov məlumat verib.
Onun sözlərinə görə, sentyabrın 24-28-də keçiriləcək sessiyanın gündəliyinə ABŞ-da baş vermiş son terror aktları ilə bağlı terrorizm məsələsi daxildir. Məsələ ətrafında ciddi müzakirələr aparılacaq və hər bir ölkə problemə münasibətini bildirməlidir. Sessiyanın gündəliyində Azərbaycanla birbaşa bağlı bənd olmasa da, parlament nümayəndələri dolayısı ilə ölkənin problemlərini əhatə edən məsələlərə toxunmaq niyyətindədir. Bununla yanaşı, Ermənistan KİV-i bildirib ki, ölkə nümayəndə heyəti bu il sentyabrın 5-də Dağlıq Qarabağda keçirilən "yerli hakimiyyət orqanlarına seçkilərin" legitimliyini sübut edən sənədləri AŞPA-ya təqdim etməlidir.

Dünən Milli Məclisin insan hüquqları üzrə komissiyasında "Xaricdə yaşayan azərbaycanlılara əlaqədar Azərbaycan Respublikasının dövlət siyasəti" haqqında qanun layihəsi müzakirə edilib.
Həmin qanun layihəsi respublika hüdudlarından kənarda yaşayan şəxslərə münasibətdə dövlətin siyasi xəttini müəyyənləşdirir. Qanun layihəsi bütün dünyaya translyasiya ediləcək beynəlxalq Azərbaycan telekanalının yaradılmasını nəzərdə tutur. Kanalın yaradılmasında məqsəd, respublikada baş verən hadisələrlə bağlı xaricdə yaşayan bütün azərbaycanlılara məlumat verməkdir. Qanun layihəsində o da qeyd olunub ki, başqa dövlətlərdə yaşayan azərbaycanlılara qarşı diskirminasiya halları aşkara çıxarsa, ölkə hökuməti həmin dövlətlərə qarşı siyasətini dəyişə bilər.

"İran prezidenti Xatəminin göstərişi ilə CAMAH lideri Doktor Mahmudəli Çöhrəqanlının xarici pasport probleminin həlli onun Azərbaycana gəlməsi üçün ciddi bir problemin aradan qaldırılması deməkdir". BAB sədrinin birinci müavini Çingiz Göytürk bu qənaətdədir.
Onun sözlərinə görə, BAB-çılar CAMAH liderini Azərbaycanda yüksək səviyyədə qəbul etməyə hazırlıq görürlər. O, həmçinin Çöhrəqanlıya xarici pasport probleminin həllində Güneydəki proseslərin də təsirinin olduğunu deyib: "BAB bir ay əvvəl BMT-nin İnsan Haqları Komissiyasına, Beynəlxalq Əfv Təşkilatına müraciət etmişdi. Çünki Doktor Çöhrəqanlının səhhətində çox ciddi problemlər yaranmışdı. İran adlanan ölkənin ərazisində onun müalicəsinə qətiyyən imkan verilmirdi. Eyni zamanda, xarici pasportunun yoxluğu ona xaricdə müalicə olunmaq imkanı da vermirdi. Ona pasport verilməsi isə Güneydə gedən azadlıq hərəkatının bir nailiyyətidir. Artıq onun Bakıya gəlməsi üçün hüquqi baxımdan maneələr yoxdur. BAB onun Azərbaycana problemsiz gəlişi istiqamətində fəaliyyətini bundan sonra da davam etdirəcək". BAB funksioneri bildirib ki, müalicə olunmaq üçün xaricə getmək niyyətində olan Çöhrəqanlı səfərini Azərbaycandan başlayacaq: "Doktorun müalicəsi Avropa ölkələrində və ya Kanadada mümkündür. Dünya azərbaycanlıları müalicə xərclərini öz üzərilərinə götürəcəklər. Doktor böyük ehtimalla müalicə üçün xarici seçəcək. Ancaq o, bildirib ki, xarici səfərinin Bakıdan, Azərbaycandan başlayacaq".

Amerikalılar "Şimal Alyansı"na müraciət edərək, Əfqanıstan ərazisinə zərbələr endirilməsi üçün mümkün məqsədlərlə bağlı informasiya verməyi xahiş edib. Amerikalı hərbçiləri hava limanları, silah anbarları, qərargahlar və təlim bazalarının yeri, həmçinin hərbi hissələrin yeri və hərəkət istiqaməti maraqlandırır. Bu barədə CNN teleşirkəti adının çəkilməsini istəməyən "Şimal Alyansı" nümayəndəsinə istinadən məlumat yayıb. Mənbənin məlumatına görə, Alyans ABŞ-ın Əfqanıstan ərazisində aparacağı istənilən hərbi əməliyyatda iştiraka hazırdır. Bununla yanaşı, lider Əhməd Şah Məsudun ölümü ilə əlaqədər Alyansın Amerikaya yardım göstərmək imkanları məhdudlaşıb.

Dünən Gürcüstan XİN sentyabrın 5-də Dağlıq Qarabağda keçirilmiş "yerli özünüidarəetmə orqanlarına seçkilər"lə bağlı bəyanatla çıxış edib. Gürcüstanın Azərbaycandakı səfirliyindən bildiriblər ki, sənəddə rəsmi Tbilisinin suverenlik, ərazi bütövlüyü və sərhədlərin toxunulmazlığına istiqamətlənmiş norma və beynəlxalq prinsiplərə tərəfdar olduğu bir daha təsdiq edilir. Gürcüstan Dağlıq Qarabağ münaqişəsində maraqlı tərəflərii ATƏT-in Minsk qrupu çərçivəsində danışıqları davam etdirməyə, eləcə də münaqişənin sülh yolu ilə nizamlanmasına mane olan hər hansı bir addımdan çəkinməyə çağırır. Gürcüstan XİN dünya ictimaiyyətinin dəfələrlə etdiyi çağırışlara baxmayaraq münaqişə zonalarında keçirilən qeyri-legitim seçkilərlə bağlı öz narahatlığını bildirib. Xarici siyasət idarəsinin bəyanatında deyilir ki, belə hərəkətlər bölgədə sabitliyə və təhlükəsizliyə xidmət etmir.

"DİFAİ" Partiyasının yaradılması üzrə Təşkilat Komitəsi (TK) formalaşdırılıb. TK-ya Vəhdət Partiyası sədrinin keçmiş müavini Adil Poladoğlu rəhbərlik edir. Yeni partiya yaradılması xalq kütlələrini yeni platforma ətrafında birləşdirmək zərurətindən doğub. Mənbənin məlumatına görə, təşkilat fəaliyyətində ölkədəki bütün xalqların partiyası olmaq məqsədini hədəf seçib. Bildirilir ki, indiki siyasi elita tarixin sınaqları önündə gücsüzlüyünü nümayiş etdirdiyi üçün Qarabağ problemi unudulur, ölkənin bütövlüyü təhlükə altına düşür, xalqın yaşayış səviyyəsi gün-gündən aşağı düşür. TK yerlərdə partiya strukturlarının formalaşdırılmasına başlandığını bildirir.