Nyu-Yorkda Ümumdünya Ticarət Mərkəzinin xarabalıqları altında qalan minlərlə adamın cəsədi tapılmayacaq. Bu barədə çərşənbə axşamı şəhər meri Rudolf Culiani bildirib. Məlumatı "France-Presse" agentliyi yayıb. Onun sözlərinə görə, hazırda xilasetmə işləri uçqun altından daha çox cəsədin çıxarılmasına yönəlib. Culiani həmçinin xatırladıb ki, terror aktları qurbanlarının qohumları itkin düşənlərin həlak olmuş kimi tanınması proseduruna başlanmasına razı olub-olmayacaqları barədə məsələni həll etməlidir. Ölüm haqda şəhadətnamə, əsasən, maliyyə məsələlərinin tənzimlənməsi üçün lazımdır. Xatırladaq ki, bəzi ekspertlərin fikrincə, yaranmış vəziyyətdə Culiani şəhər meri postunun müddətini uzada bilər. Çərşənbə axşamı həmçinin məlum olub ki, son məlumatlara görə, itkin düşənlərin sayı 6 min 347 nəfərdir. Nyu-Yorkda uçqun altından 287 nəfərin cəsədi çıxarılıb. Onların 224-ü tanınıb.

Ermənistanda üç siyasi qüvvə - Xalq Partiyası, "Anrapetutyun" (Respublika) və Milli Birlik Partiyası prezident Robert Köçəryanın impiçmentini gerçəkləşdirmək üçün əhali arasında imza toplamağa başlayıb. Təşəbbüs qrupunun üzvləri ölkənin hansı bölgələrində imza toplandığına aydınlıq gətirmirlər və bunun həmin bölgələrin əhalisinə təzyiqlərlə nəticələnə biləcəyindən ehtiyatlandıqlarını bildirirlər. Sabah isə "Anrapetutyun" Ermənistan paytaxtında prezident əleyhinə mitinq keçirəcək. Partiyanın imzaladığı bəyanatda deyilir ki, "Robert Köçəryanın hakimiyyətdə qalması ölkənin inkişafını təhlükə altına alır və Ermənistan yavaş-yavaş dövlətçiliyini itirir".

Azərbaycanın baş naziri Artur Rəsizadə MDB ölkələri hökumət başçılarının terrorizmlə mübarizə məsələlərinə həsr olunmuş yığıncağında iştirak etmək üçün bu gün Moskvaya yola düşür. Yığıncaq sentyabrın 28-də keçiriləcək. Xatırladaq ki, görüşün təşəbbüsçüsü Rusiya prezidenti Vladimir Putindir. Görüş zamanı hökumət başçıları MDB ölkələri ərazisində terrorizmlə mübarizə tədbirlərinin gücləndirilməsinə dair bir sıra təklifləri və sözügedən ölkələrin bu istiqamətdə siyasətini müzakirə edəcək.

Dünən Milli Məclisin Regional məsələlər daimi komissiyası "Yerli (bələdiyyə) vergilər və ödənişlər haqqında" qanun layihəsini birinci oxunuş üçün müzakirə edib. Qanun layihəsi bəldiyyə tərəfindən vergi və ödənişlərin tutulmasının ümumi əsaslarını, bələdiyyələrin maliyyə qurumları ilə bələdiyyə vergi tədiyyəçiləri arasında iqtisadi münasibətləri tənzimləyəcək, onların hüquq və vəzifələrini müəyyən edəcək.

Sentyabrın 26-da "Zerkalo" qəzetinin baş redaktoru Elçin Şıxlinski və müxbir S.Nəsibli Respublika Prokurorluğuna çağırılıb və onlara rəsmi xəbərdarlıq edilib. Bu barədə Daxili İşlər və Respublika Prokurorluğunun mətbuat xidmətlərinin birgə yaydığı açıqlamada bildirilir. Xəbərdə deyilir ki, prokurorluğun bu addımı atmasına səbəb qəzetin bugünkü sayında "Terakt v Zaqatalax imeyut rossiyskie korni" başlıqlı məqalənin dərcidir. Məqalədə "Kütləvi informasiya vasitələri haqqında" qanunun 10-cu maddəsinin tələblərinə zidd olaraq həqiqətə uyğun olmayan xəbərlər yayılıb.

Sentyabrın 25-də Moskva vaxtı ilə saat 21.00-da Azərbaycanın Rostov-Bakı sərnişin qatarı Şimali Qafqaz dəmir yolunun "Meçetinskaya" və "Ataman" stansiyaları arasında yoldan çıxıb. Lokomotiv və beş vaqon (baqaj və dörd sərnişin vaqonu) relsdən çıxıb. Bu barədə TURANa Azərbaycan Dəmir Yolu İdarəsindən bildiriblər. Mənbənin məlumatına görə, dörd sərnişin yüngül yaralanıb. Lakin Rusiyanın məlumatına görə, 11 nəfər xəsarət alıb. Zərərçəkənlərə tibbi yardım göstərilib. Rusiya qəzanın səbəblərini araşdırır. İlkin məlumatlara görə, buna səbəb "dəmir yollarının nasazlığıdır". Nasazlıq aradan qaldırıldıqdan sonra bu gün Moskva vaxtı ilə saat 5.27-də sərnişin qatarı Bakı istiqamətində yoluna davam edib. Zərər çəkmiş vaqonlar Rusiya vaqonları ilə dəyişdirilib. Qatar sentyabrın 27-də Bakıda olacaq.

Sentyabrın 25-də Səbayel rayon Polis İdarəsi "Ulus" qəzetinin təsisçisi Yaqub Abbasovun və qəzetin redaktor müavini Surxay Qocayevin işi üzrə ittihamı CM-in 221-ci maddəsilə (xuliqanlıq) dəyişib. Qeyd edək ki, bu il iyulun 14-də Abbasov və Qocayev həbs edildikdən dərhal sonra həmin maddə ilə təqsirli biliniblər. Lakin sonra müstəntiq bunu CM-in 127-ci maddəsilə (qəsdən yüngül bədən xəsarəti yetirmə) dəyişib və beləliklə, istintaq yenidən ilkin ittihama qayıdıb. İttihamın təkrar dəyişməsinə səbəb bu il iyulun 5-də qəzetin keçmiş əməkdaşı Aybəniz İlqara bədən xəsarəti yetirilməsi barədə ekspertiza rəyidir. Xatırladaq ki, məhz bu fakt üzrə "ulus"çulara qarşı cinayət işi qaldırılıb. İstintaqın fikrincə, sözügedən şəxslər A.İlqarı mənəvi və fiziki təhqir edib.

Sentyabrın 28-də Moskvada MDB ölkələrinin hökumət başçıları şurasının növbəti iclası keçiriləcək. Bu barədə Nazirlər Kabinetindən verilən məlumata görə, iclasda imzalanacaq 17 sənədə qəbul edilzcək. Bundan başqa hökumət rəhbərləri ABŞ-da baş vermiş terror aktları ilə bağlı bəyanat imzalayacaqlar. Qeyd edşək ki, səfərdə Azərbaycan nümayəndə heyətinə baş nazir Artur Rəsizadə rəhbərlik edəcək. Qeyd edək ki, əvvəlcə iclasın Aşxabadda keçirilməsi planlaşdırılsa da, ABŞ-dakı terror hadisəsindən sonra təhlükəsizlik baxımından Moskva seçilib.