24 avqust referendumu Azərbaycan cəmiyyətinin iqtidarın yeritdiyi siyasəti dəstəklədiyini aşkar şəkildə təsdiqlədi. Ümumxalq səsverməsinin yekunlarına dair statistik göstəricilərlər bu fikri vurğulamağa əsas verir. Mərkəzi Seçki Komissiyasının (MSK) elan etdiyi ilkin məlumata görə, referendumda ölkə üzrə səsvermə hüququ olan 4 milyon 410 min nəfər əhalinin 88,47 faizi (3 milyon 899 min 242 nəfər) iştirak edib.
Referendumla bağlı respublika üzrə mövcud olan 100 dairədən 99-da (42 saylı Xankəndi dairəsi istisna olmaqla) 5000-dən artıq məntəqə formalaşdırılmışdı. Məntəqə komissiyalarının işində ümumilikdə 29 min 850 nəfər iştirak edib. "Referendum haqqında" Qanuna əsasən, ümumxalq səsverməsinin rəsmi nəticələri 1 həftə müddətində açıqlanmalıdır. Bununla belə, MSK dünən referendumun ilkin nəticələrini elan edib. Qeyd edək ki, həmin nəticələr MSK-nın "Seçkilər" Avtomatlaşdırılmış İnformasiya Mərkəzinin rəqəmlərinə əsaslanır və hələlik hüquqi nəticə sayılmır. Bununla belə, sonrakı dəqiqləşdirmələr nəticəsində sözügedən rəqəmlərin ciddi şəkildə dəyişəcəyini gözləmək lazım deyil. Odur ki, ilkin nəticələri prinsipcə referendumun əsas yekunu saymaq olar. Beləliklə, dairə refenrendum komissiyalarından MSK-ya daxil olan ilkin nəticələrə görə, 24 avqust referendumuna çıxarılmış Konstitusiyaya dəyişikliklər paketinə (8 blok üzrə) münasibət aşağıdakı kimi olub:
1. "Azərbaycan Respublikasının Avropa Şurası (AŞ) qarşısında öz üzərinə götürdüyü öhdəliklərdən irəli gələn dəyişikliklər" hissəsi: lehinə - 97,07 faiz, əleyhinə - 2,63 faiz, etibarsız bülletenlər - 0,28 faiz.

2. "Azərbaycan Respublikasının insan hüquqlarının və əsas azadlıqlarının müdafiəsi haqqında Avropa Konvensiyasına qoşulmasından irəli gələn dəyişikliklər" hissəsi: lehinə - 97,01 faiz, əleyhinə - 2,69 faiz, etibarsız bülletenlər - 0,3 faiz.

3. "Referendumun keçirilməsinin təkmilləşdirilməsindən irəli gələn dəyişikliklər" hissəsi: lehinə - 96,82 faiz, əleyhinə - 2,69 faiz, etibarsız bülletenlər - 0,35 faiz.

4. "Azərbaycan Respublikası Milli Məclisinə seçkilərlə bağlı dəyişikliklər" hissəsi: lehinə - 96,77 faiz, əleyhinə - 2,96 faiz, etibarsız bülletenlər - 0,27 faiz.

5. "Azərbaycan Respublikası prezidentinin seçkiləri ilə bağlı dəyişikliklər" hissəsi: lehinə - 96,99 faiz, əleyhinə - 2,73 faiz, etibarsız bülletenlər - 0,28 faiz.

6. "Dövlət hakimiyyəti orqanlarının fəaliyyətinin təkmilləşdirilməsindən irəli gələn dəyişikliklər" hissəsi: lehinə - 96,79 faiz, əleyhinə - 2,92 faiz, etibarsız bülletenlər - 0,29 faiz.

7. "Məhkəmə islahatlarının keçirilməsindən irəli gələn dəyişikliklər" hissəsi: lehinə - 96,79 faiz, əleyhinə - 2,8 faiz, etibarsız bülletenlər - 0,41 faiz.

8. "Digər dəyişikliklər" hissəsi: lehinə - 96,53 faiz, əleyhinə - 2,85 faiz, etibarsız bülletenlər - 0,41 faiz.

MSK-nın məlumatında deyilir ki, səsverməni müşahidə etmək üçün 16 partiyanın nümayəndəsinə 56 min vəsiqə verilmişdi. Onlardan 31 mini bu hüquqdan istifadə edib. Ümumən 30 minə yaxın vəsiqə iqtidaryönlü partiyalara verilib və onların 27500 nəfəri müşahidə prosesində iştirak edib. Müxalifət partiyalarına 22 minə yaxın vəsiqə verilsə də, səsvermə prosesində onlardan 3500-ə yaxın müşahidəçi iştirak edib.
Məlumatda bildirilir ki, avqustun 27-dək məntəqə və dairə referendum komissiyalarının rəsmi protokolları MSK-ya daxil olacaq. Qanuna uyğun olaraq, avqustun 30-na kimi referendumun rəsmi yekunları MSK tərəfindən elan olunacaq, 20 gündən sonra isə məlumatlar mətbuatda dərc ediləcək.
MSK-nın məlumatında o da qeyd olunur ki, referendum zamanı qanun pozuntuları ilə bağlı quruma heç bir rəsmi şikayət daxil olmayıb.

Dünən Bakıda dövlət sərhədlərinin delimitasiya və demarkasiyası üzrə Azərbaycan-Rusiya komissiyası çərçivəsində danışıqlar başlayıb.
Danışıqlara Azərbaycan xarici işlər nazirinin müavini Xələf Xələfov və Rusiya XİN-in baş müşaviri Petr Burdıkin başçılıq edir. Danışıqlar bu gün başa çatmalıdır. İclasda məsləhətləşmələrin əsas mövzusu Azərbaycan-Rusiya sərhədinin 70 kilometrlik sahəsində 7 koordinatın delimitasiyasıdır. Tərəflər əvvəlki görüşlərdə qalan bütün koordinatlar üzrə sərhədlərin delimitasiyası üzrə problemli məsələləri həll etmişdilər.
Qeyd edək ki, Rusiya ilə danışıqlarda Azərbaycanın komissiyasına baş nazirin birinci müavini Abbas Abbasov, Daxili İşlər, Müdafiə nazirliklərinin, Dövlət Sərhəd Xidmətinin, Dövlət Torpaq və Xəritəçəkmə Komitəsinin rəhbərləri və məsul işçiləri, habelə ölkənin sərhədyanı rayonlarının icra başçıları daxildirlər.
Öncə tərəflər bəyan etmişdilər ki, iki ölkə arasında mövcud olan 396 kilometrlik sərhəd üzrə tam razılıq əldə olunub. Lakin sonradan məlum oldu ki, sərhədin təxminən 70 kilometri üzrə 7 məntəqədə bəzi mübahisəli ərazilər var. Lakin qeyd etmək lazımdır ki, bu ərazilər böyük deyil və söhbət təxminən 10-15 metr məsafədən gedir. Verilən məlumata görə, delimitasiya üzrə danışıqlar başa çatdıqdan sonra tərəflər sərhədin demarkasiyasına başlayacaqlar. Buraya sərhəd postlarının, atributlarının qoyulması, koordinatların bilavasitə xəritələrdə əks olunması daxildir. Bu arada Rusiya tərəfi sahilyanı dövlətlərin Xəzərdə yurisdiksiya zonasının genişləndirilməsinə dair təşəbbüslə çıxış edib.
"Rusiya həmin zonanın 15 milədək genişləndirilməsini təklif edir" - deyə Rusiya XİN-in Xəzər məsələləri üzrə işçi qrupunun rəhbəri, xüsusi tapşırıqlar üzrə səfir Andrey Urnov bildirib. O xatırladıb ki, hazırda Xəzəryanı ölkələrin milli zonaları 10 millə məhdudlaşdırılıb. Bununla yanaşı Urnov qeyd edib ki, Xəzəryanı dövlətlər milli yurisdiksiya zonasının genişləndirilməsi imkanları və əlavə balıqçılıq zonası məsələsini dəfələrlə qaldırıb. "Rusiya bu iki zonanın bir 15 millik zona ilə əvəzlənməsini təklif edir və milli yurisdiksiya (həmçinin sərhəd, gömrük və başqa nəzarət növləri) ona aid olunur", - deyə o bildirib.
Xatırladaq ki, rəsmi Bakı dənizin su səthi və qalınlığı daxil olmaqla milli sektorlara bölünməsinə tərəfdardır. Son vaxtlar Bakının mövqeyi bir qədər yumşalsa da, əvvəlki mövqeyindən geri çəkilmək istəmir. Çünki ölkə Konstitusiyasına görə, Azərbaycanın Xəzərdəki sərhədləri dövlət sərhədi hesab olunur.

Şimaldan soyuq hava axınının daxil olması nəticəsində avqustun 30-dək Azərbaycan ərazisində hava şəraiti qeyri-sabit olacaq. Ekologiya və Təbii Sərvətlər Nazirliyi milli hidrometeoroloji proqnozlar xidmətindən verilən məlumata görə, həmin günlərdə qısamüddətli yağıntı olacağı gözlənilir. Dağ və dağətəyi rayonlarda yağıntı intensivləşəcək. Leysan yağışları nəticəsində dağ çaylarının səviyyəsinin qalxma ehtimalı var.
Bakıda və Abşeronda gecə və səhər saatlarında qısamüddətli yağıntı ehtimalı var. Şimal küləyinin sürəti 9-14 m/s olacaq, arabir 18-20 m/s-ə çatacaq. Həmin günlərdə havanın temperaturu mərkəzi aran rayonlarında +25 +30, dağ rayonlarında +16 +21, dağətəyi rayonlarda +22 +26, Bakıda və Abşeronda +24 +29 dərəcə olacaq.

Sentyabrın 7-dən 9-na kimi Altıağac qəsəbəsinin "Cənnət bağı" adlanan kurort mərkəzində "Azərbaycanın dağ rayonlarının davamlı inkişafı" mövzusunda konfrans keçiriləcək.
Azərbaycanın dağ rayonlarının inkişafı Assosiasiyasından (ADRIA) verilən məlumata görə, tədbir zamanı dağ rayonlarında kənd təsərrüfatı, turizm, xalq peşələri kimi sahələrin inkişafı, həmçinin dağ rayonlarının ekoloji durumunun yaxşılaşdırılması məsələləri müzakirə olunacaq.
Konfransda iştirak etmək üçün Bakıya İsveçrənin dağ rayonlarının inkişafı üzrə komitəsinin sədri Teo Maysenin başçılıq etdiyi parlament nümayəndə heyəti gələcək. Bundan savayı, konfransda iştirak etmək üçün İsveçrənin qeyri-hökumət təşkilatları olan CDC və SAB nümayəndələri gələcəklər, onlar sözügedən tədbirin sponsorlarıdır.
Azərbaycan tərəfdən tədbirdə Milli Məclisin, Xarici İşlər, İqtisadi İnkişaf, Kənd Təsərrüfatı, Gənclər, İdman və Turizm, həmçinin Ekologiya və Təbii Ehtiyatlar nazirliklərinin nümayəndələri iştirak edəcəklər.

Dünən Cənubi Afrika Respublikasının (CAR) Yoxannesburq şəhərində BMT İnkişaf Proqramı (BMTİP) çərçivəsində davamlı inkişaf üzrə sammit öz işinə başlayıb.
Setyabrın 4-nə kimi davam edəcək tədbirdə xarici işlər naziri (XİN) Vilayət Quliyev də iştirak edəcək. XİN-dən bildiriblər ki, nazir avqustun 29-da bu tədbirə qatılacaq. Azərbaycan nümayəndə heyətinin tərkibinə həm də Ekologiya və Təbii Ehtiyatlar Nazirliyinin nümayəndələri də daxil ediləcək. Yoxannesburq sammitinin əsas məqsədi dünyanın əhalisi üçün arzu olunan həyat səviyyəsinin seçimi üçün imkan və hüquqların, həm onlar üçün, həm də gənc nəsillər üçün sağlam və təhlükəsiz gələcəyin təmin edilməsi kimi dəyərlərin möhkəmləndirilməsidir.

ABŞ-ın keçmiş prezidenti Bill Klinton bir il davam edən axtarışlardan sonra özünə münasib iş tapa bilib.
Keçmiş prezident kaliforniyalı milyarder Ronald Berklin investisiya şirkətində baş məsləhətçi işləyəcək. Klinton səlahiyyət müddətini başa vurmuş dövlət başçısı kimi ildə 157 min dollar təqaüd alır. Amma bu onun yeganə qazanc mənbəyi deyil. Klinton dünyada ən bahalı mühazirəçilərdən sayılır. O, hər mühazirəsi üçün təqribən 100 min dollar qonorar tələb edir. Eks-prezidentə tok-şou aparıcılığı, hətta yüksək qonorar müqabilində döyüş filmlərində çəkilməyi təklif ediblər, amma Klinton daha ciddi sahədə işləmək qərarına gəlib.

Prezident Heydər Əliyev Azərbaycan və İran arasında "Dostluq və əməkdaşlıq münasibətlərinin prinsipləri haqqında" müqavilənin, Azərbaycan hökuməti və Ukrayna Nazirlər Kabineti arasında "Vətəndaşların vizasız gediş-gəlişi haqqında" sazişin təsdiq edilməsi barədə sərəncam imzalayıb.
Dövlət başçısı, həmçinin bu ilin iyunun 1-də Bakı şəhərində imzalanmış "Azərbaycan ilə İtaliya hökumətləri arasında mədəniyyət, elm və texnologiya sahəsində əməkdaşlıq haqqında" müqaviləni də təsdiq edib.

Yaxın günlərdə "Xidməti və mülki silah haqqında" Qanunun icra mexanizmini təsdiq edən sərəncam imzalana bilər.
Hüquq mühafizə orqanlarından verilən məlumata görə, qanunun icra mexanizmi müəyyənləşdirildikdən sonra vətəndaşlara silah verilməsi və silah gəzdirməklə bağlı prosedur təsdiq olunacaq. Bu qərara uyğuq olaraq millət vəkillərinə də qanun əsasında silah verilməsi təmin olunacaq. Verilən silahlar Daxili İşlər Nazirliyində qeydiyyata götürüləcək.

Son statistik məlumatlara görə, Türkiyə əhalisi 67 milyon 803 min 927 nəfər təşkil edir. Bu barədə Türkiyənin dövlət naziri Tuncay Toskay məlumat verib. Nazirin sözlərinə görə, son 10 il ərzində Türkiyə əhalisi ildə orta hesabla 1,1 milyon adam artıb. Əhalinin 65 faizi böyük şəhərlərdə məskunlaşıb. O cümlədən İstanbulda 10 milyon və Ankarada 4 milyon adam yaşayır. 1997-ci ildə əhalinin siyahıyaalmasına əsasən, Türkiyə əhalisi 62,5 milyon nəfər təşkil etmişdi.

Çeçenistanda Rusiya Hərbi Hava Qüvvələrinə məxsus "Mi-26" vertolyotunun qəzaya uğramasının səbəblərini araşdıran komissiya yekun qərar çıxarıb. Komissiya üzvləri məlumat verib ki, "Mi-26" vertolyotu çeçen terrorçuları tərəfindən "yer-səma" raketi ilə vurulub. Xatırladaq ki, avqustun 19-da Xanqala yaxınlığında vertolyotun qəzaya uğraması nəticəsində 116 adam həlak olub və 30 hərbçi ağır vəziyyətdə xəstəxanaya çatdırılıb.