Bolqarıstan Prezidenti Georgi Pırvanovun Azərbaycana rəsmi səfəri iki ölkə arasında qarşılıqlı faydalı əməkdaşlığın inkişafı üçün əlamətdar təkan ola bilər. Bunu Bolqarıstan rəhbərinin Bakıda keçirdiyi görüşlərin nəticələri də təsdiqləyir.
Qeyd edək ki, Azərbaycanla Bolqarıstan arasında diplomatik münasibətlər 1992-ci ilin iyununda qurulsa da, ikitərəfli əlaqələr yalnız 1995-ci ildə Prezident Heydər Əliyevin bolqar həmkarı Jelyu Jelevin dəvətilə Sofiyaya rəsmi səfərindən sonra inkişaf etməyə başlayıb. 1998-ci ildən Azərbaycanla Bolqarıstanın Avropa-Asiya nəqliyyat dəhlizi (TRACECA) layihəsində təmsil olunması, həmçinin 1999-cu ildə Bolqarıstan rəhbəri Pyotr Stoyanovun Bakıya səfəri iki ölkənin əməkdaşlığında iqtisadi münasibətləri nisbətən canlandırdı.
Ölkələrimiz beynəlxalq və regional müstəvidə, o cümlədən Qara dəniz İqtisadi Əməkdaşlıq Təşkilatı çərçivəsində fəal əməkdaşlıq edir, Bolqarıstan Azərbaycan neftinin Avropaya nəqlində maraqlıdır. 2004-cü ildə Bolqarıstanın ATƏT-ə sədrlik etdiyini də nəzərə alsaq, bu ölkənin yeni rəhbəri G.Pırvanovun ölkəmizə səfərinin xüsusi önəmini qeyd edə bilərik.
Təsadüfi deyil ki, bu məqam prezidentlərin təkbətək və heyətlərarası görüşündə də vurğulanıb. Azərbaycanla Bolqarıstan arasında bütün sahələrdə münasibətlərin inkişafı üçün çox gözəl zəmin olduğunu nəzərə çatdıran Prezident İlham Əliyev əmin olduğunu bildirib ki, iki ölkənin hökumətlərarası komissiyasının Bakıda keçirilən iclasının praktik nəticələri də tezliklə özünü göstərəcək.
İ.Əliyev Bolqarıstanın ATƏT-in sədri kimi Qarabağ münaqişəsinin nizamlanmasında səylərini də yüksək qiymətləndirib. Yaxın vaxtlarda Sofiyada Azərbaycan səfirliyi açılacağını deyən dövlət başçısı bu faktın da qarşılıqlı ədaqələrə töhfə verəcəyini bildirib.
Həmkarının dedikləri ilə həmfikir olduğunu qeyd edən Bolqarıstan rəhbəri də ümidvar olduğunu bildirib ki, onun səfəri hər iki ölkənin müvafiq təsisatlarına dəqiq və aydın fəaliyyət nümunəsi verəcək.
