Bakının təxminən 100 kilometrliyində Xəzərin qoynunda inşa edilən Neft Daşları texniki intellektin və titanik əməyin vəhdətidir. 1949-cu il noyabrın 7-də Xəzər dənizinin Azərbaycan sektorunda - "Qara daşlar"da qazılmış ilk quyu fontan vurub. Bununla da dünya neft sənayesinin tarixində dənizdən neft hasilatı başlanıb. Dünyada neft sənayesinin beşiyi olan Azərbaycan yeni neft erasının da əsasını qoyub.
Ötən 55 ildə əfsanələr şəhərinin qəhrəman əməkçiləri ümumilikdə 173 milyon ton neft və 12,5 milyard kubmetr qaz hasil ediblər. 1967-ci ildə neft hasilatı ən yüksək həddə çatıb - 7,6 milyon ton neft çıxarılıb. Hazırda illik neft hasilatının həcmi təxminən 820 min ton təşkil edir.
üNeft Daşları 300 kilometr estakadanı əhatə edir. Neft Daşlarında 6 beşmərtəbəli və 2 doqquzmərtəbəli yaşayış evi, bir inzibati bina tikilib. Burada istilik elektrik stansiyası, 5 mədən, 22 kompressor aqreqatı, neft yığımı məntəqəsi, çörək zavodu, xəstəxana, mədəniyyət evi, ticarət və ictimai iaşə obyektləri, idman zalı fəaliyyət göstərir.
Əfsanələr şəhərinin sakinlərinin fədakar əməyi bütün Azərbaycan neftçiləri üçün nümunədir. Neft Daşlarında orta əməkhaqqı Azərbaycan üzrə ümumi əməkhaqqı ilə müqayisədə 3 dəfə yüksəkdir və 1,5 milyon manat təşkil edir. Ayrı-ayrı sahələrdə çalışan mühəndislərin maaşı 3,5 milyon manata, fəhlələrin maaşı 2,5 milyon manata çatır.
